विदेशी दूतावासहरुलाई टार्गेट गर्दै इराकको बगदादमा २४ घण्टाभित्र दोस्रो रकेट हमला
द्वन्द्वग्रस्त देश इराकको बगदादमा २४ घण्टाभित्र दोस्रो रकेट हमला भएको छ । रिपोर्टका अनुसार यसपटक दुई मिसाइल उच्च सुरक्षा भएको ग्रीन जोनमा खसेको छ ।
यो स्थानमा थुप्रै विदेशी दूतावास छन् । दुई ठूला धमाकापछि पूरा ग्रिन जोनमा सुरक्षा अलार्म बज्न थाल्यो । कुनै पनि संगठनले अहिलेसम्म हमलाको जिम्मेवारी लिएको छैन ।
यद्यपि, अमेरिकी अधिकारीले भने यसको पछाडि इराकमा रहेको इरान समर्थित शिया विद्रोही संगठन ‘हाशेद’ माथि शंका जताएको छ ।
इरान समर्थित संगठन पिएमएफका प्रवक्ताका अनुसार हमलामा उनका पाँच सिपाहीको मृत्यु भएको छ । संगठनले सुरुमा हमलाका लागि इजराइलमाथि शंका जताएको थियो ।
पिएमएफ शिया लडाकूको एउटा गुट हो । यो आधिकारिक रुपमा इराकी सुरक्षाबलमा समावेश छ । रकेट हमलामा मारिएका मुहंदिस यो संगठनका उप–प्रमुख थिए ।
इराकमा अमेरिकी सेनाविरुद्ध गएकोमा ट्रम्प प्रशासनले उनीहरुलाई ब्ल्याकलिस्ट गरेको थियो ।
इराकमा इरान समर्थित संगठनलाई निशाना बनाइरहेको थियो अमेरिकाः
अमेरिकाले आजकाल इराकमा इरान समर्थित कतैब हिज्बुल्ला विद्रोहीलाई निशाना बनाइरहेको छ । दुई हप्ता अघि अमेरिकी एयरस्ट्राइकमा यी संगठनका २५ लडाकू मारिए ।
अमेरिकाका अनुसार उसले यो हमला इराकमा अमेरिकी ठेकेदारको मृत्युको बदला लिनका लागि गरेको थियो । कतैब हिज्बुल्लाका नेताले हमलाका लागि अमेरिकालाई परिणाम भोग्नका लागि चेतावनी दिएका थिए ।
इरानको हमलामा अमेरिकालाई भएन कुनै क्षती
एकदिन अघि मात्रै इरानले इराकमा रहेका दुई अमेरिकी सैन्य बेसमा २२ मिसाइल दागेको थियो ।
इरानले अनबर प्रान्तमा ऐन अल–असद एयर बेस र इरबिलको एक ग्रीन जोनमाथि हमलामा अमेरिकाका ८० सैनिक मारिए ।
यद्यपि, अमेरिकी राष्ट्रपति डोनल्ड ट्रम्पले यो दाबीलाई झुटो बताएका छन् । न्यूज एजेन्सी रोयटर्सले यससँग सम्बन्धित केही सेटलाइट फोटो जारी गरेको छ ।
इरानले अमेरिकी एयरबेसमा दागेको मिसाइलले सात भवनमा क्षती पुगेको देखिएको छ ।
