भन्सार शुल्क बढेसँगै आकासियो सुनको भाउ, प्रतितोला ६१ हजार ५ सयमा कारोबार
काठमाडौं : सरकारले बजेटमार्फत सुन आयातमा भन्सार वृद्धि गरेपछि नेपाली बजारमा सुनको भाउ महंगिएको छ । सरकारले आव २०७६/७७ को बजेटमा प्रति १० ग्राम ८ सय ५० रुपैयाँले सुनमा भन्सार वृद्धि गरेको छ । जसको प्रत्यक्ष असर नेपाली बजारमा परेको छ ।
गत बुधबार सरकारले बजेट वक्तव्य जारी गरेको थियो । उक्त दिन सुनको भाउ प्रतितोला ५९ हजार ५ सय रुपैयाँ रहेको थियो । त्यसको भोलिपल्टसम्म सुनको भाउ स्थिर रहेपनि बजारमा काँचो सुनको भने अभाव रह्यो । शुक्रबार सुनको भाउ एकैपटक १५ सय रुपैयाँले बढेर ६१ हजार पुग्यो । दुईदिन भित्र यति ठूलो मूल्य अन्तरमा यस वर्ष सुनको कारोबार भएको थिएन ।
यस्तै, सुनको मुल्य थप ५ सयले बढेर वर्षकै कीर्तिमान कायम गर्दै आईतबार प्रतितोला ६१ हजार ५ सयमा कारोबार भयो । सोमबार भने सुनको भाउ स्थिर रहँदै ६१ हजार ५ सयमै कारोबार भइरहेको छ । एक्कासी सुनको भाउ बढ्नुको अर्को कारण अन्तर्राष्ट्रिय बजारको मूल्यमा भएको बद्धि पनि हो ।
एकसाता अघि मात्र अन्तर्राष्ट्रिय बजारमा सुन प्रति आउन्स ९२८.३४ ग्राम० २० अमेरिकी डलरले बद्धि भएको थियो । सुनको अन्तर्राष्ट्रिय मूल्यमा आएको वृद्धिका कारण पनि एक साताभित्र प्रतितोला ८ सय रुपैयाँ बढ्न गएको देखिन्छ ।
सुनचाँदी व्यवसायी महासंघका अध्ययक्ष मोहनकुमार सुनारले भन्सार शुल्क वृद्धिसँगै अन्तर्राष्ट्रिय बजारमा भाउ बढ्न जाँदा नेपालमा मूल्य वृद्धि हुनु स्वभाविक भएको बताए । तर यसरी ह्वात्तै भाउ बढ्दा त्यसअसर बजारमा परेको उनले बताए ।
अध्यक्ष सुनारकाअनुसार बजारमा सुनको भाउ बढेसँगै ग्राहकको चाप पनि घटेको छ । ‘अन्तर्राष्ट्रिय बजारमा भाउ पनि बढ्नु, सरकारले भन्सार शुल्क पनि बढाउनु । जसले गर्दा नेपाली बजारमा पनि सुनको भाउ महँगिएको छ ।’ उनले भने, ‘यसको असर बजारमा पर्न जाँदा अहिले सुन पसलमा ग्राहकको चाप ह्वात्तै घटेको छ ।’
उपभोक्ताहरु सुनको मूल्य घट्ने पर्खाइमा रहेकाले पनि पसलमा सुन किन्नेको चाप घटेको व्यापारीहरुको भनाइ छ । भाउ महँगिए पनि विवाहका लागि सुन किन्नेहरु फाट्टफुट्ट आउने गरेको सुन व्यवसायीले बताए ।
यस पटकको आर्थिक विधेयकमार्फत सरकारले बैंकले आयात गर्ने सुनमा मात्र नभएर विदेशमा बस्ने नेपालीले भित्र्याउने सुनको भन्सार शुल्कसमेत बढाएको छ । जेठ र असारमा वैवाहिक लगन अधिक भएकाले यसको प्रत्यक्ष असर विवाह गर्नेहरुलाई पर्न जाने देखिन्छ ।
