दादुरा खोप नलगाइएका बालिबालिकाको आमाबुवाले अब जरिवाना तिर्नुपर्ने
बालबालिकालाई लगाईने खोप मध्ये दादुरा खोप पनि एक हो ।
उक्त खोप अनिवार्य गराउनको लागि जर्मनी सरकारले नयाँ कानून बनाएको छ । बालबालिकालाई दादुराको खोप नलगाईदिने आमा-बुवाले २ हजार ७ सय ५० डलर अर्थात् ३ लाख १५ हजार रुपैयाँ जरिवाना तिर्नुपर्नेछ ।
मिजल्स प्रोटेक्सन एक्ट (दादुरा रोकथाम ऐन) अन्तर्गत अभिभावकले आफ्नो बच्चालाई स्कूल वा किन्डरगार्टनमा भर्ना गर्नु अघि दादुराको खोप लगाएको प्रमाण पेश गर्नुपर्ने हुन्छ । दादुराबाट बच्नका लागि दुई पटक खोप लगाउनुपर्छ ।
दादुरा संक्रमित व्यक्तिले खोक्दा, हाच्छिउँ गर्दा हावामार्फत् फैलन्छ । स्वास्थ्य मन्त्रालयका प्रवक्ताले सीएनएनसँगको कुराकानीमा स्वास्थ्यकर्मी, डेकेयर वर्कर, शिक्षक र श्रमिकले पनि यो नियम अनुसार खोप लगाउनुपर्छ । यो नियम सन् २०२० मा लागू हुँदैछ ।
दादुरा दुषित सतह छुँदा पनि फैलन्छ । दादुरा आउँदा ज्वरो आउने, खोकी लाग्ने, पातलो सिँगान बग्ने, आँखा रसिलो हुने र शरीरमा रातो दाग देख्न थाल्छ । स्वास्थ्य मन्त्रालयका अनुसार जनवरीदेखि अक्टोबरबीच दादुराका ५०१ घटना सार्वजनिक भए ।
नयाँ कानून अनुसार आमा-बुवाले खोप लगाएको प्रमाणपत्र पेश गर्नुपर्ने हुन्छ ।
मन्त्रालयका अनुसार खोप नलगाइएका बालबालिकामाथि जरिवाना लगाइनेछ । साथै, स्कूलबाट निकालिनेछ । युनिसेफका अनुसार सन् २०१८ मा संसारभरी लगभग तीन लाख ५० हजार दादुराका घटना दर्ता भएका छन् । यो आँकडा सन् २०१७ को तुलनामा दोब्बर हो ।
विश्व स्वास्थ्य संगठनका अनुसार ९५ प्रतिशत जनसंख्यालाई दादुराको खोप लगाउन आवश्यक छ ।
इटलीमा पनि खोप अनिवार्य:
इटलीमा पनि मार्चदेखि खोप अनिवार्य गरिएको छ । प्रशासनले यदि बच्चालाई खोप लगाइएको छैन भने स्कूल नपठाउन चेतावनी दिएको थियो ।
यदि खोप नलगाइएका बालबालिका स्कूलमा भेटिए उनीहरुका आमा–बुवालाई ५ सय युरो (करिब ६३ हजार रुपैयाँ) जरिवाना तिर्नुपर्नेछ ।
