किमलाई ट्रम्पको ‘उत्कृष्ट’ चिठी
उत्तर कोरियाका सरकारी सञ्चारमाध्यमका अनुसार अमेरिकी राष्ट्रपति डोनाल्ड ट्रम्पले उत्तर कोरियाका नेता किम जोङ उनलाई व्यक्तिगत चिठी पठाएका छन् । उक्त चिठीलाई किमले ‘उत्कृष्ट भनेका छन् ।
नेता किमले ट्रम्पको चिट्ठीलाई ‘उत्कृष्ट’ भनेको र त्यसमा रहेको विषयवस्तु मनपराएको तथा त्यसमा सोचविचार गरेको उत्तर कोरियाको समाचार संस्था केसिएनएले जनाएको छ । यस्तै किमले अमेरिकी राष्ट्रपति ट्रम्पको असाधारण प्रयास तथा साहसको पनि प्रशंसा गरेको जनाइएको छ ।
जुनको सुरुमा अमेरिकी राष्ट्रपति ट्रम्पले किमबाट आफूले सुन्दर चिट्ठी पाएको बताएका थिए । ट्रम्पले कहिले र कसरी आफ्नो चिट्ठी किमलाई पठाएको भन्ने खुलेको छैन । यसबारे अमेरिकी राष्ट्रपति कार्यालय ह्वाइट हाउसले केही बताएको छैन ।
गएको फेब्रुअरीमा भियतनाममा भएको ट्रम्प-किम वार्ता बिना सहमति टुंगिएको थियो । त्यसपछि रोकिएको संवाद पुनः सुरु गर्ने प्रयासका रुपमा ट्रम्प–किमबिचको पछिल्लो पत्र-व्यवहारलाई हेरिएको छ ।
