नदीमा डुबेर बेपत्ता भएका गोताखोर सुरज साउदको शव फेला
सप्तरीको हनुमाननगर कंकालिनी नगरपालिका–१ स्थित कोशी नदीमा डुबेर बेपत्ता भएका सशस्त्र प्रहरीका गोताखोर सुरज साउदको शव फेला परेको छ । सशस्त्र प्रहरी बल, नेपालका सहायक प्रवक्ता डीएसपी शैलेन्द्र थापाका अनुसार आइतबार बिहान साउदको शव पेला परेको हो ।
कुरिनटारबाट गएका अनुभवी गोताखोर डीएसपी पुरुषोत्तम भण्डारीको टोलीले कोशी ब्यारेजको ५५ नम्बर ढोका नजिकबाट साउदको शव निकालेको हो । साउद नम्बर १३ गण पर्सा दरबन्दी भई नम्बर २ छिन्नमस्ता बाहिनी मुख्यालयमा कार्यरत थिए ।
नदीमा शनिबार प्रदेशस्तरीय विपद् पूर्वतयारीका कार्यक्रम गर्ने तय भएपछि अभ्यास गरिरहेका बेला साउद र नम्बर १ श्रीअन्तु गण इलाम दरबन्दी भई दन्तकाली विशेष कार्य तालिम शिक्षालय सप्तरीमा कार्यरत हरदेव राजवंशी ब्यारेजको ढोका नम्बर ५५/५६ देखि उत्तरतर्फ पानीको भूमरीमा फसेर बेपत्ता भएका थिए । झापाका राजवंशी र डोटीका साउदले २०८० र ०८१ सालमा गोताखोर तालिम पूरा गरेका थिए ।
