भारत-पाकिस्तान तनावः भारतको हवाई आक्रमणपछिका दृश्यहरू (तस्वीरहरू)

- नागरिक टाइम्स/संवाददाता

२४ बैशाख २०८२, बुधबार ००:००

गए राति भारतले पाकिस्तानमाथि सैन्य आक्रमण गर्‍यो । उक्त आक्रमणबारे भारत र पाकिस्तानले फरक-फरक प्रतिक्रिया दिएका छन् । आक्रमण सटिक र सफल भएको भारतको दावी छ । पाकिस्तानले भने त्यसको कडा जवाफ दिइएको दावी गरेको छ ।

पाकिस्तानको सञ्चारमाध्यम डन डटकमले पाकिस्तानी अधिकारीहरूलाई उद्धृत गर्दै भारतीय आक्रमणमा परी ८ जनाको मृत्यु भएको समाचार प्रकाशित गरेको छ । त्यस्तै ३५ जना घाइते भएका छन् ।

पाकिस्तानी सेनाले ‘छिमेकी देश’ले ६ स्थानमा गए राति आक्रमण गरेको जनाएको छ । त्यसको जवाफमा पाँच भारतीय जेट खसालेको जवाफ पाकिस्तानी सेनाले दिएको उक्त समाचारमा उल्लेख छ ।

डनका अनुसार भारत र पाकिस्तानबीचको सैन्य झडप स्थानीय समयअनुसार बिहान करिब १ बजे भएको भारतीय हवाई आक्रमणपछि सुरु भएको थियो । पाकिस्तानका सूचनामन्त्री अताउल्लाह तरारले बिहान करिब पौने ३ बजे दुई भारतीय जेट खसालेको बताए ।

त्यस्तै स्थानीय समयअनुसार ३:४२ मा पीटीभीले तेस्रो विमान खसालेको उल्लेख गर्‍यो । त्यस्तै चौथो र पाँचौँ विमान खसालिएको पुष्टि बिहान ५ बजेपछि बताइएको थियो ।

रक्षामन्त्री ख्वाजा आसिफले ब्लूमबर्ग टीभीसँगको कुराकानीमा पाँच भारतीय विमान खसालेको बताएका छन् । त्यस्तै जियो न्युजमा सूचनामन्त्री अताउल्लाह तरारले पाकिस्तानले पाँच भारतीय जेट खसालेको उल्लेख गरेका छन् ।

यद्यपि, पाकिस्तानको यो दावीमा भारतीय पक्षले भने प्रतिक्रिया दिएको छैन ।

पाकिस्तानले एक रिपोर्टमा जनाएअनुसार भारतले ६ स्थानमा गरेका २४ वटा आक्रमणमा ८ जना पाकिस्तानी मारिएका छन् । त्यस्तै ३५ जना घाइते भएका छन् भने दुई जना बेपत्ता छन् ।

उता यो आक्रमणपछि संयुक्त राष्ट्रसंघका महासचिव एन्टोनियो गुटेरेशले दुवै पक्षलाई संयम रहन आग्रह गरेका छन् । अमेरिकाले यसलाई दुःखद भनेको छ र यसको अन्त्य हुनुपर्ने उल्लेख गरेको छ ।

पाकिस्तानले भने यसको उपयुक्त जवाफ दिइने बताएको छ । पाकिस्तानको विदेश मन्त्रालयले संयुक्त राष्ट्रसंघले आफूहरूले चुनेको सयमा चुनेको स्थानमा यो आक्रमणको जवाफ दिने अधिकार रहेको उल्लेख गरेको छ ।