हेटौँडामा जमिनमा भासिएर गाडी हराएको विषयमा भूगर्भविद्ले गरे १० घण्टा लामो अध्ययन
जमिन भासिएर रोकिराखेको गाडी हराएको विषयमा हेटौँडामा भूगर्भविद्ले अध्ययन थालेका छन् । मङ्गलबार बिहान ९ बजेबाट खानी तथा भूगर्भ विभागका ४ जना प्राविधिक टोलीले अध्ययन थालेका हुन् ।
हेटौँडा १६ र १७ को सिमाना स्थित गैरी गाउँमा जमिन भासिएर गाडी हराएको विषयमा खानी तथा भूगर्भविद् नारायण अधिकारीको नेतृत्वमा अध्ययन थालिएको हो । भूगर्भविद् कृष्ण पाण्डे र मणी खनाल लगायतको टोलीले मङ्गलबार बिहान ९ बजेदेखि ७ बजेसम्म अध्ययन गरेका हुन् ।
उनीहरुले प्रोटोन म्याग्नेटो मिटर, पावर अगर लगायतका विधि मार्फत अध्ययन गरेका हुन् । भूगर्भविदहरुले घटना स्थलको आसपासको भौगोलिक अवस्थिति, भू बनोट, माटोको सतह लगायतको विषयमा अध्ययन गरेका थिए भने गाड भासिएको स्थान पत्ता लगाउन म्याग्नेटो मिटर र पावर अगर मार्फत अध्ययन गरेका थिए ।
सुरुवातमा भूगर्भ विदहरुले स्थलगत रूपमा गाडी भासिएको क्षेत्रको भुवनोट अवलोकन गरेका थिए भने भूगर्भ विभागले अध्ययन गरेर जारी गरेको सो क्षेत्रको नक्सांकनका विषयमा अध्ययन गरेका थिए ।
भूगर्भविद् अधिकारीका अनुसार सो क्षेत्रको भुबनोट निकै कमजोर र तरलता युक्त रहेको छ । माथिल्लो भागमा केही माटो भरिएपनि तल्लो भागमा बालुवा तथा दलदल युक्त माटो रहेको उनले बताए ।
उक्त भू-बनोटका कारण गाडी भासिएको स्थानमा प्रेसर जेनेरेट भएर जमिन तरलतामा परिणत भएको उनले बताए । घटना स्थलको भू बनोट ग्लेइ सिल्ड तथा ५ मिटर तल बालुवा भेटिएको उनले बताए ।
भूमिगत पानी नजिक रहेको उक्त बालुवा भएको क्षेत्रमा केही डाइनामिक लोड परेमा एजिटेड हुने र वैज्ञानिक भाषामा सेयर स्ट्रेन्थ शून्य हुने उनले बताए । जसले गर्दा उक्त क्षेत्रको माटो ठोस नभएर तरल बन्ने अवस्था रहने उनले बताए ।
अध्ययन टोलीले गाडी भासिएको स्थान आसपास म्याग्नेटो मिटर प्रयोग गरेर गाडीको लोकेसन पत्ता लगाउने काम भएको उनको भनाई छ । उनका अनुसार म्याग्नोटो मिटरले गाडी भासिएको स्थानमा बनेको खाल्डो भन्दा केही पूर्व तर्फ ‘मेटल डिटेक्ट’ भएको छ । सो क्षेत्रको चुम्बकीय आकर्षण निकै बलियो र कडा रहेको उनले बताए ।
म्याग्नेटो मिटर अप्रत्यक्ष रूपमा फलामजन्य वस्तु पत्ता लगाउने विधि भएकाले सो स्थानमा गाडी नै छ भन्न नसकिने उनको भनाई छ ।म्याग्नेटो मिटरले लोकेट गरेको स्थानमा भूगर्भ विदको टोलीले ३ स्थानमा पावर अगर विधिबाट गाडीको लोकेसन पत्ता लगाउने काम गरेको थियो ।
जसमा जमिन मुनी ६ मिटरमा फलाम जन्य वस्तु रहेको निश्चित गरेको उनले बताए । पावर अगर ‘ड्रिलिङ’ मेथड भएकाले ३ स्थानमा गरिएको परीक्षण मध्ये २ स्थानमा ५.४० मिटर र ५.६० मिटर (करिब ६ मिटर) मा फलाम जन्य वस्तु रहेको उनको भनाई छ ।
पावर अगर गरिएका मध्ये एउटामा रड ८ मिटरको गहिराइसम्मा सजिलै गएको र त्यसपछि गरिएका दुई वटा ड्रिलिङका क्रममा ड्रिल रड जम्मा ६ मिटरसम्म मात्रै धसेको उनले बताए ।
‘हामीले म्यग्नेटो मिटर प्रयोग गर्दा खाल्डो भएको स्थानको पूर्व तर्फ चुम्बकीय आकर्षण बढी फेला परेको थियो । सोही अनुसार पावर अगर मार्फत ३ स्थानमा ड्रिल गर्दा २ स्थानमा कडा फलामजन्य पदार्थ रहेको तथ्य पत्ता लागेको छ ।’ उनले भने, ‘त्यो गाडी नै हो भन्न सकिन्न । हामीले गाडीका पाटपूर्जा भेट्ने गरी खोजेका होइनौ । हामीले हाम्रो भूगर्भ शास्त्र अनुसार उक्त स्थानको ५.४० र ५.६० मिटरमा फलामको आकर्षण बढी रहेको छ । पावर अगरको विधि पनि सो स्थानभन्दा तल पुग्न सकेन । जसका कारण सो स्थानमा गाडी हुन सक्छ भन्ने अनुमान रहेको छ ।’
गाडीको अवस्था र उक्त विषयको थप अध्ययन बुधबार पनि जारी रहने उनले बताए । बुधबार बिहानबाट फलामजन्य वस्तु लोकेट भएको स्थानको आसपास पुन पावर अगर प्रयोग गरी ड्रिल गर्ने र सो पश्चात् अन्य भौगोलिक अध्ययन गर्ने तयारी रहेको उनले बताए । सो स्थानको माटो तला भूमिगत जलको परीक्षण गर्ने गरी केही नमुनाहरू पनि सङ्कलन गरिएको उनको भनाई छ ।
गत शुक्रबार उक्त स्थानमा जमिन भासिएर ना ४ च ४८३३ नम्बरको उक्त गाडी घाँस काट्ने मेसिन लोड गरेर त्यहाँ पुगेर रोकिराखेको अवस्थामा अगाडिको पाङ्ग्रा भासिएको र जग लगाएर निकाल्ने क्रममा एक्कासि जमिनमै भासिएर बेपत्ता भएको थियो ।
लगातार ३ दिन खोज्दासम्म गाडीको अवस्था पत्ता नलागेपछि हेटौँडा उपमहानगरपालिकाले आइतबार उक्त स्थानको अध्ययनका लागि भूगर्भविद्लाई ल्याएर अध्ययन गर्ने गरी पत्राचार गरेको थियो ।
