मेयर साम्पाङमाथि आफ्ना समर्थक उक्साएर माओवादी कार्यकर्ता कुटाएको आरोप
धरान उपमहानगरपालिकाका मेयर हर्क साम्पाङमाथि आफ्ना समर्थक उक्साएर माओवादी नेतालाई कुटपिट गरेको आरोप लागेको छ । धरान- ११ मा सडक बनाउने विषयमा विवाद भएको थियो । उक्त विवाद मिलाउन पुगेका मेयर साम्पाङले उक्साएपछि उनका समर्थकद्वारा माओवादी नेता सन्तोष लिम्बूमाथि कुटपिट भएको आरोप छ ।
धरान–११ मा नगरकोट–बानडाँडाको टोल समितिको अध्यक्ष हुन् लिम्बू । लिम्बूको पहलमा गत वर्ष बाटो खोलिएको थियो । उक्त बाटोको स्तरोन्नतिका लागि आफूले नै पहल गरेर प्रदेश सरकारको भौतिक योजना मन्त्रालयबाट २० लाख बजेट विनियोजन गराएको लिम्बूको दाबी छ ।
उनले भने, ‘म अध्यक्ष भएकाले र प्रदेशको भौतिक योजना मन्त्रालयबाट २० लाख बजेट विनियोजन गराएँ । बाटोको स्तरोन्नति भइरहेको थियो । विवाद भयो । मेयर सा’प आउनुभयो । तर, विवाद मिलाउनुभन्दा मसँग बाझ्न थाल्नुभयो । उनका कार्यकर्ताले हातपात गरे । कुटपिट गरे ।’
बाटोको स्तरोन्नति आधा मात्र भएपछि स्थानीयहरूले पूरा बाटोको स्तरोन्नति हुनुपर्ने माग गरेका थिए । त्यसको लागि केही श्रमदान केही अबको आर्थिक वर्षको बजेटमा माग गरेर पूरा गर्ने सहमति भएको लिम्बू बताउँछन् ।
‘बाँकी बाटोको स्तरोन्नति यही आर्थिक वर्षमा फेरि प्रदेश सरकारलाई बजेट विनियोजन गराइमाग्ने भनेर सहमति भयो,’ उनी भन्छन् । तर, मेयर साम्पाङ आएर मसँग छलफल समन्वय नै नगरेर काम गर्ने भनेर थर्काएको लिम्बू बताउँछन् । उनले भने, ‘विवाद मिलाउनुपर्नेमा मेयर साम्पाङले उल्टै तपाईं को हो ? वडाअध्यक्षको बराबर हैसियत नभएकाले ठूलो कुरा गर्ने भनेपछि विवाद भएको हो । म नागरिकले मेयरलाई प्रश्न गर्न नपाउने हुन्छ ? भन्दा उनका कार्यकर्ताले कुटपिट गरे । मैले मेयरमाथि, कुटपिट गर्नेलगायतका नाममा प्रहरीमा उजुरी दिएको छु,’ उनले भने ।
साम्पाङले भरतपुरकी मेयर रेनु दाहाललाई सामाजिक सञ्जालमा कटाक्ष गरेर लेखेको दिन नै माओवादी कार्यकर्तालाई धरानमा कुटपिट गर्न मान्छे उक्साएको आरोप लागेको छ । साम्पाङले तीन दिनपहिला दाहाललाई लक्षित गरेर दाहालले आफूलाई ठूलो योजना सञ्चालन गर्न सुझाव दिएको भन्दै लेखेका थिए, ‘रेनु दाहालले मलाई ठूलो योजना गर्नुपर्थ्यो भनेर भनेछ ! रेनुजी, तपाईंको बाउ प्रधानमन्त्री हुँदा सप्तकोसीको पानी ल्याउन पैसा मागेको २० लाख मात्रै छुट्याइदियो त मैले के गर्ने ?’
साम्पाङ यत्तिमा रोकिएका छैनन् । उनले नेकपा माओवादी केन्द्र सामन्त र दलाल, पुँजीपतिहरूको पार्टी बनिसकेको आरोप पनि लगाएका छन् । उनले लेखेका छन्, ‘बिनापैसा विकास कसरी गर्न सकिन्छ ? जनताको शक्तिलाई ढुङ्गा हान्न, भएको संरचना भत्काउन र मान्छे मार्नमा होइन, देश निर्माणमा कसरी जोड्न सकिन्छ भन्ने कुरा सिक्न मकहाँ आउनू ! भिजन भनेको के हो, त्यो म सिकाउँछु !’ साम्पाङले माओवादी पार्टी खराब, अध्यक्ष पुष्पकमल दाहाल प्रचण्ड खराब भनेर पनि लेखेका छन् ।
उनले लेखेका छन्, ‘बाउ ठीक रैनछ, पार्टी ठीक रै’छ त ! एयरपोर्ट मागेको, तपाईंकै पार्टीको सुदन किराँती मन्त्री थिए र तपाईंकै बाउ प्रधानमन्त्री थिए, विराटनगरमा छँदै छ, किन चाहियो धरानमा भने । प्रम हुँदा तपाईंको बाउले बजेटजति सबै तपाईंकै पालिकामा मात्रै खनाइदिएर विभेद गरे । अब ८४ मा म आफैँ आएर गर्नुपर्ला त्यो ठाउँमा भन्दै छु ।’
