प्रदीप गिरिको स्वास्थ्य अवस्था स्थिर, मेडिसिटीमा अस्पतालमा उपचार जारी
समाजवादी चिन्तक तथा नेपाली कांग्रेसका नेता प्रदीप गिरिको स्वास्थ्य अवस्था स्थिर रहेको छ । प्रतिनिधिसभा सदस्य समेत रहेका गिरीको उपचार जारी रहेको अस्पतालका चिकित्सकहरुले जनाएका छन् ।
गिरिका स्वकीय सचिव कृष्ण खनालका अनुसार साँझ १० बजेसम्म उनलाई भेन्टिलेटरमा नै राखिएको छ र स्वास्थ्य अवस्था स्थिर रहेको छ ।
‘उहाँलाई भेन्टिलेटरमा राखिएको छ । उहाँको स्वास्थ्य अवस्था स्थिर नै छ, यद्यपि उपचार जारी छ” खनालले भने । गिरि ललितपुरस्थित मेडिसिटी अस्पतालमा उपचाररत छन् ।
मेडिसिटीमा डा. पंकज वर्मनसहितको चिकित्सक टोलीले गिरिको उपचार गरिरहेका छन् ।
निमोनिया निको हुन नसकेको तथा घाँटीमा देखिएको क्यान्सर अन्य भागमा पनि फैलिँदै गएकाले थप समस्या देखिएको चिकित्सकहरूले बताएका छन् ।
झन्डै एक वर्ष भारतको मुम्बईमा घाँटीको क्यान्सरको उपचार गराएर साउन दोस्रो साता स्वदेश फर्किएलगत्तै निमोनिया देखिएपछि उनलाई मेडिसिटी अस्पताल भर्ना गरिएको थियो ।
प्रधानमन्त्री शेरबहादुर देउवाले गत मंगलबार तथा बिहीबार सभामुख अग्निप्रसाद सापकोटाले अस्पताल पुगेर स्वास्थ्य अवस्थाबारे जानकारी लिएका थिए ।
आज दिनभर कांग्रेस नेता, कार्यकर्ता तथा गिरिका शुभचिन्तक अस्पताल पुगेका थिए ।