आफ्ना उम्मेदवार जिताउन एक ढिक्का हुने गठबन्धनको निर्णय
चुनावी तालमेलमार्फत उम्मेदवारी दिएका व्यक्तिलाई जिताउन एक ढिक्का हुने सत्तारुढ पाँच दलीय गठबन्धनले निर्णय गरेको छ ।
कांग्रेसका नेता तथा सञ्चार तथा सूचना प्रविधिमन्त्री ज्ञानेन्द्रबहादुर कार्की दिएको जानकरी अनुसार बालुवाटारमा आज बसेको नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी र राष्ट्रिय जनमोर्चाको बैठकले गठबन्धनको निर्णयअनुसार उम्मेदवारी दिएका व्यक्तिलाई जिताउन एक ढिक्का हुने निर्णय गरेको हो ।
महानगर र उपमहानगरको भागबन्डा केन्द्रबाटै गरिएको, धेरै जिल्लामा स्थानीयस्तरबाट तालमेल भएको र सहमति जुट्न नसकेका ठाउँमा पनि सकभर सहमति जुटाउन आग्रह गरिएको कार्कीले जानकारी दिए ।
आन्तरिक असमझदारीलाई समाधान गर्दै चुनाव केन्द्रित हुन बैठकले नेता, कार्यकर्तालाई आग्रह गरेको छ । अहिले आवेशमा आएर गठबन्धन र दलको निर्णय विपरीत दर्ता भएका उम्मेदवारी फिर्ता हुने पनि कार्कीको भनाइ छ ।
