नगरपालिका र गाउँपालिकाको उम्मेदवार गठबन्धनमा भोलि बेलुकासम्म टुंगो लाग्ने
स्थानीय चुनावमा नगरपालिका र गाउँपालिकाको उम्मेदवार गठबन्धनमा भोलि बेलुकासम्म टुंगो लाग्ने नेकपा माओवादी केन्द्रका नेता वर्षमान पुनले बताएका छन् ।
सत्ता गठबन्धनमा देशैभरका ६ महानगर र ११ उपमहानगरपालिकाको चुनावी तालमेलबारे सहमति भइसकेकाले अब नगरपालिका र गाउँपालिकामा पनि त्यसैगरी टुंगो लाग्ने बताएका हुन् ।
हामीले महानगरपालिका र उपमहानगरपालिकाको चुनावी तालमेलमा सहमति गर्यौँ, भोलि बेलुकासम्म नगरपालिका र गाउँपालिकाको पनि चुनावी तालमेलको विषयमा टुंग्याउछौँ’, उनले भने, ‘ त्यसका लागि पार्टीको तर्फबाट पनि त्यसैअनुसार लाग्छौँ ।’
उनले स्थानीय तहमा तालमेलको विषय मिलाउन केन्द्रीय कार्यदलले सहजीकरण, समन्वय र अनुगमन गर्ने पनि बताए । यस्तै पुनले आ-आफ्नो दलबाट नगरपालिका र गाउँपालिका उम्मेदवार सिफारिस भएपनि समस्या नहुने जिकिर गरे।
‘सबै पार्टीहरुले आ-आफ्नो तयारी अनुरुप उम्मेदवार सिफारिस गर्ने नै भए। तालमेल हुने भएमा जसको जहाँ भागवण्डा पर्छ त्यहाँको उम्मेदवार अघि बढ्ने हुन्छ । अरु पछाडि हट्ने स्थिति हुन्छ’, उनले भने, ‘सिफारिस गर्दैमा समस्या हुँदैन ।’
पाँच दलभित्र एकले अर्कालाई भोट हाल्ने विश्वासको वातावरण हुने भएकाले सबै ढुक्क रहन पनि पुनले आग्रह गरे । ‘हामीले जहाँ जहाँ नगरपालिका र गाउँपालिकामा चुनावी तालमेल हुने वातावरण बन्छ, त्यहाँ तालमेल गर्छौ।
तालमेल नहुने स्थानीय तहमा गठबन्धनभित्रै प्रतिस्पर्धा हुन्छ’, पुनले भने, ‘यदि गठबन्धनभित्र तालमेल नभएमा एमालेसँग भने तालमेल नगर्ने अण्डरस्ट्यान्डिङ बनाएका छौ।’
