दार्चुलाको बङ्गाबगरमा निर्माणाधीन तटबन्ध तत्काल रोक्न डा.रावलको माग
नेकपा एमालेका नेता डा.भीम रावलले सुदूरपश्चिमको दार्चुलाको बङ्गाबगरमा केही दिनअघि भारतीय पक्षबाट एकतर्फी रूपमा निर्माण गरिएको तटबन्ध रोक्न माग गरेका छन् ।
आज प्रतिनिधि सभाको बैठकमा बोल्दै नेता रावलले भारतले अन्तर्राष्ट्रिय कानुन‚ दुई देशको छिमेकीको असल सम्बन्धको मान्यता विपरीत तटबन्ध निर्माण गरिएको र स्थानीयहरूले त्यसको विरोध गरिरहेकाले उक्त तटबन्ध निर्माणलाई तत्काल रोक्न माग गरेका हुन् ।
त्यहाँका जनताले आफ्नो भौगोलिक अखण्डताको रक्षाका लागि महाकाली नदीलाई नेपालतिर फर्काउन लागेका भारतका गाडीलाई ढुङ्गाले हान्नुपर्ने स्थिति आइपर्नु लज्जास्पद भएको उनले बताए ।
उनले भने, ‘बङ्गाबगरमा निर्माण हुँदै गरेको तटबन्ध निर्माण कार्य रोकिनुपर्ने माग स्थानीयहरूले राख्दा नेपाल सरकारको तर्फबाट कुनै पनि पाइला चालेको देखिएन ।’
उनले भने, ‘नेपाली नागरिकको स्वाभिमान र स्वतन्त्रतामाथि आँच आउने कुरामा यदि सरकारले ध्यान नदिने हो भने त्यस्तो सरकार जनविरोधी र अलोकतान्त्रिक सरकार ठानिन्छ ।’
त्यस्तै केही समयअघिको बाढीबाट त्यहाँको गल्फाईंमा वन कार्यालय र भूसंरक्षण कार्यालय नै महाकाली नदीको पारि पट्टी भारततर्फ परेको बताउँदै नेता रावलले त्यस बेला पनि भारतले एकतर्फी रूपमा तटबन्ध बनाउन खोजे पनि विरोध भएपछि रोकिएको उनले दाबी गरे ।
