म्याग्दीमा असिना पानीले हिउँदेबाली नष्ट गरेपछि किसान चिन्तित
गण्डकी प्रदेश स्थित म्याग्दीका विभिन्न ठाउँमा हिजो (सोमबार) बेलुका असिना पानी परेको छ । बेनी नगरपालिका-३ मरेक, मुसुङ, छेपारे, डोले, बालम, मङ्गला गाउँपालिकाको झाँक्रेपानी, धापुङलगायतका ठाउँमा हिजो बेलुका असिना परेको हो ।
असिनाले हिउँदेबाली गहुँ र जौ तथा सुन्तलाका फलमा समेत क्षति गरेको स्थानीयले बताएका छन् । असिनाले हिउँदेबाली नष्ट गरेपछि किसान चिन्तित भएका छन् ।
हिउँ पर्ने बेला असिना पर्नु अनौठो भएको किसानले बताएका छन् ।क्षतिको विवरण सङ्कलन गरी राहतको व्यवस्था गर्न किसानले पालिका र कृषि ज्ञानकेन्द्रसँग माग गरेका छन् ।
