प्रजातन्त्र र कांग्रेसलाई बलियो बनाउन सबै लाग्नुपर्छ : प्रधानमन्त्री देउवा
नेपाली कांग्रेसका सभापति एवं प्रधानमन्त्री शेरबहादुर देउवाले प्रजातन्त्र र पार्टीलाई बलियो बनाउन सबै लाग्नुपर्ने बताएका हुन् ।
पार्टीको १४ औं महाधिवेशनमा भाग लिन यहाँ आएका जिल्ला सभापति, क्षेत्रीय सभापति एवं महाधिवेशन प्रतिनिधिको सम्मानमा आज बिहान वरिष्ठ नेता रामचन्द्र पौडेलद्वारा आयोजित चियापान कार्यक्रममा उनले प्रजातन्त्र बलियो बनाउन कांग्रेसका नेता तथा कार्यकर्ता लाग्नुपर्ने बताएका हुन् ।
‘पार्टीभित्रको निर्वाचनमा हारजित हुन्छ, प्रजातन्त्र र पार्टीलाई बलियो बनाउन सबै लाग्नुपर्छ,’ उनले भने । उनले पार्टीभित्र अनुशासन र सम्मान गर्ने परम्परा कायम राख्नुपर्नेमा जोड दिए ।
सभापति देउवाले आफूहरुसँगसँगै लोकतन्त्र प्राप्तिका लागि सङ्घर्ष र जेल जीवन बिताएको प्रङ्सँग उल्लेख गर्दै महान् नेताले बोलाएको चियापानमा आउन पाउँदा आफूलाई भाग्यमानी ठानेको बताए ।
पार्टी सभापतिका अर्को उम्मेदवार डा। शेखर कोइरालाले पार्टीभित्रको आन्तरिक प्रतिस्पर्धा निर्वाचन भएकाले काँग्रेसलाई बलियो बनाउन सबै लाग्नुपर्ने बताए ।
उनले भने, ‘पार्टीभित्र सभापति र वरिष्ठ नेता दुवै सम्मानित नेता हुनुहुन्छ, उहाँलाई सम्मान, इज्जत र आदर गर्नुपर्छ ’ । उनले अनुशासित पार्टी निर्माणका लागि सबै लाग्नुपर्ने बताए ।
नेता कोइरालाले अन्तरआत्मा के भन्छ, त्यहीअनुसारको विवेक प्रयोग गरेर मतदान गर्नसमेत सबै प्रतिनिधिलाई आग्रह गरे ।
पार्टीका वरिष्ठ नेता पौडेलले पार्टीभित्रको गलत प्रवृत्तिका विरुद्धमा आफ्नो लडाइँ सधैँ जारी रहने बताए । उनले भने ‘मुलुकमा स्थायित्व, विकास र सुशासन दिन म सधैँ तत्पर रहन्छु, पार्टीको महाधिवेशनमा उम्मेदवार नभए पनि राजनीतिबाट आफूलाई अलग राखेको छैन’।
वरिष्ठ नेता पौडेलले आफू निष्ठा र प्रतिबद्धतामा विचलित नभएको बताउँदै आफ्नो विवेकको सही प्रयोग गर्न मतदातालाई आग्रहसमेत गरे ।
उनले आसन्न तीन तहकै निर्वाचनमा प्रतिस्पर्धा गर्नुपर्ने कठिन चुनौतीलाई सामना गर्न पार्टीभित्र एकता, अनुशासन र सुदृढ सङ्गठन विस्तारको आवश्यकता रहेको बताए ।त्यस्तै पौडेलले सभापतिका प्रत्यासी डा. शेखर कोइरालाको पक्षमा नबोलेको भन्दै त्यस्तै पार्टी नेता कार्यकर्ताले नाराबाजी गरेका थिए ।
