सुनौलीबाट आएका ११ जना अफगानी नागरिक सिनामंगलबाट पक्राउ
प्रहरी केन्द्रीय अनुसन्धान ब्युरोले सिनामंगलबाट ११ जना अफगानी नागरिकलाई पक्राउ गरेको छ । सिनामंगलस्थित एक घर छापा हानेर ११ जना अफगानी नागरिकलाई पक्राउ गरेको छ ।
ब्युरोको टोलीले सोमबार बिहान उनीहरु बसेको घरमा छापा हानेर पक्राउ गरेको हो ।सुनौली नाकाबाट गैर कानुनी रूपमा नेपाल भित्रिएर काठमाडौँ आइपुगेका उनीहरु सिनामंगलस्थित एक घरमा बसेका थिए ।
उनीहरुलाई अध्यागमन विभागलाई बुझाउने तयारी भएको ब्युरोले जनाएको छ ।अफगानी नागरिक सुनौली नाकाबाट नेपाल भित्रिएको सूचना ढिलो गरेर सुरक्षा संयन्त्रले पाएको थियो ।
आइतबार मात्रै यसबारे जानकारी पाएपछि गैर कानुनी रूपमा भित्रिने तेस्रो देशका नागरिकमाथि निगरानी बढाउन गृहले दक्षिणतर्फका सबै सीमा नाकामा सुरक्षा जाँचलाई कडा पारेको छ ।
नेपालस्थित शरणार्थी सम्बन्धी उच्च आयोगको कार्यालयले गुपचुप अफगानस्तानीलाई अस्थायी आश्रय दिएर राखे पनि त्यसको सुइँको गृह प्रशासनले समयमै पाएन ।
