उपत्यकाको फोहोरको मुद्दा लिएर प्रधानमन्त्रीलाई भेट्न पुगे मेयर शाक्य
काठमाडौं महानगरपालिकाका मेयर विद्यासुन्दर शाक्यले उपत्यकाको फोहोर उठाउन नसकिने अवस्था आएको भन्दै प्रधानमन्त्री शेरबहादुर देउवालाई भेटी ध्यानाकर्षण गराएका छन् ।
देउवालाई भेट्न सोमबार मेयर उपमेयर हरिप्रभा खड्गी श्रेष्ठलगायत जनप्रतिनिधि बालुवाटार पुगेका थिए । मेयर शाक्यले उपत्यकाको फोहोर फाल्ने स्थान नुवाकोटको सिसडोलसम्म पुग्ने सडक निर्माणका लागि प्रधानमन्त्रीलाई ध्यानाकर्षण र अनुरोध गरेका छन् ।
प्रधानमन्त्री देउवाले जति सक्दो छिटो उपत्यकाको फोहोर व्यवस्थापनको वातावरण बनाइदिने आश्वासन दिएका छन् ।सडक निर्माणका लागि महानगरले नै खर्च व्यहोर्ने पनि उनले बताए ।
