कांग्रेसका विवादित सदस्यबारे निर्णय लिन नयाँ मापदण्ड बनाउने शीर्ष नेताबीच सहमति
नेपाली कांग्रेसका विवादित सदस्यबारे निर्णय लिन नयाँ मापदण्ड बनाउने शीर्ष नेताबीच सहमति भएको छ ।
शुक्रबार कांग्रेस सभापति शेरबहादुर देउवाको निवास बूढानीलकण्ठमा करिब ४ घण्टा चलेको शीर्ष नेताबीचको छलफलमा विवादित विषय टुंग्याउन नयाँ मापदण्ड बनाउने सहमति भएको हो ।
छलफलमा सभापति देउवा, वरिष्ठ नेता रामचन्द्र पौडेल, कृष्णप्रसाद सिटौला, सहमहामन्त्री प्रकाशशरण महत, नेता मिनेन्द्र रिजाल र रमेश लेखक सहभागी थिए ।
सहमहामन्त्री महतले भने, ‘क्रियाशील सदस्यता छानविन समितिमा निरुपण हुन नकसेको विवादमाथि छलफल गरेर विधिसम्म तरिकाले टुंग्याउनु पर्छ कुरा भएको छ ।’
त्यसका लागि नयाँ मापदण्ड बनाइने उनको भनाइ छ । यस्तै वरिष्ठ नेता पौडेलले पनि मापदण्ड भनेपछि विवाद समाधान हुने बताए ।
छानविन समिति प्रवेश नै नगरी नेतृत्व तहमा बुझाएको सप्तरी र बाराबाट आएको क्रियाशील सदस्यताका सन्दर्भमा नयाँ मापदण्ड बनाइने छ ।
यस्तै धनुषा ४ नम्बर क्षेत्र र सर्लाही २ नम्बर क्षेत्रका सन्दर्भमा जारी अनशन र धर्नालाई सम्बोधन गरिने महतले बताए ।समायोजन सम्बन्धी विवादले रोकिएको क्रियाशील सदस्यतालाई पनि विधिसम्मत तवरले टुङ्ग्याइने पौडेलले बताए ।
दुई घण्टा छलफलमा बसेर बाहिरिएका सभापति देउवाले काँग्रेस र काँग्रेस हुन चाहनेलाई क्रियाशील सदस्यबाट बन्चित हुनुनपर्ने गरी समाधान खोज्नुपर्ने बताएका थिए । देउवाले छलफलमा सहभागी नेताहरुलाई सोही अनुसार निकास खोज्न भनेका थिए ।
महाधिवेशन हुन नसकेर बारम्बार कार्यतालिका संशोधन गर्ने कुराले राम्रो सन्देश दिएको छैन । अब महाधिवेशन हुने गरी कार्यतालिका बनाउनुपर्छ,’ देउवाको भनाइ छ । महाधिवेशन कहिले र कसरी गर्ने सकिन्छ भन्नेबारे वस्तुपरक ढंगले नयाँ कार्यतालिका ल्याउनुपर्ने देउवाले बताए ।
हिजोसम्म भदौ १६-१९ मै महाधिवेशन हुन्छ भन्दै आएका देउवाले अब नयाँ कार्यतालिकाको आवश्यकता औल्याएका छन् । तर पौडेलले कुनै हालमा भदौभित्र महाधिवेशन गर्नुपर्ने बताए ।
‘विवाद टुंगिहाल्छ, भदौभित्र महाधिवेशन गर्ने गरी कार्यतालिका ल्याउनुपर्छ,’ बैठकपछि पौडेलले भने । तर काँग्रेसको निर्वाचन गर्ने संयन्त्र निर्वाचन समितिले भने भदौमा महाधिवेशन गर्न सम्भव नभएको बताएको छ ।
निर्वाचन समितिले गर्नुपर्ने अधिकांश काम बाँकी नै भएकाले भदौमा वडा अधिवेशन मात्र गर्ने सकिने समितिले हिसाब सुनाएको थियो ।
