अजय देवगनको कार रोकेर किसानबारे प्रश्न सोध्ने युवक पक्राउ
बलिउड अभिनेता अजय देवगनको कार रोकेर किसान आन्दोलनमाथि प्रश्न सोध्ने एक व्यक्तिलाई पक्राउ गरिएको छ ।
समाचार एजेन्सी पिटिआईले एक प्रहरी अधिकारीको भनाई उद्धृत गर्दै पक्राउ पर्ने व्यक्ति २८ वर्षका ड्रायभर राजदीप सिंह भएको जानकारी दिएको छ । उनी मूलतः पञ्जाबका निवासी हुन् ।
ती व्यक्तिले अजय देवगनले कृषि कानूनको विरोध गरिरहेका किसानको समर्थनमा किन केही गरेनन् भन्ने विषयमा प्रश्न सोधेका थिए ।
एक प्रहरी अधिकारीले भने, ‘यो घटना मंगलबार बिहान साढे १० बजे भएको हो । सिंहले गोरेगाँवमा फिल्म सिटी बाहिर अजय देवगनको कारलाई रोके र उनले आन्दोलनकारी किसानको समर्थनमा किन बोलिरहनुभएका छैनन् भनेर जान्न चाहे ।’
अधिकारीका अनुसार अजय देवगनका अंगरक्षक प्रतीप इन्द्रसेन गौतमले प्रहरीमा ऊजुरी दिएपछि सिंहलाई पक्राउ गरिएको हो ।
दिंदोसी थानाका वरिष्ठ इन्स्पेक्टर धर्मेन्द्र कांबलेले पीटीआईसँगको कुराकानीमा सिंहलाई गलत तरिकाले रोकेको, शान्ति भंग गरेको, जानी जानी अपमान गरेको र आपराधिक धम्कीको आरोप लगाइएको छ ।
https://twitter.com/i/status/1366758493546377221