तत्काल पार्टी सचिवालयको बैठक बोलाउन अध्यक्षद्वयलाई वामदेवको आग्रह
नेकपाका उपाध्यक्ष बामदेव गौतमले नेकपा अध्यक्षद्वयलाई तत्काल पार्टी सचिवालयको बैठक बोलाउन आग्रह गरेका छन् ।
गौतमले दुवै अध्यक्ष केपी शर्मा ओली र पुष्प कमल दाहाललाई तुरुन्तै सचिवालय बैठक धुम्वाराहीस्थित पार्टीको केन्द्रीय कार्यालयमा बोलाउन अनुरोध गरेका हुन् ।
गौतमले अध्यक्षद्वयलाई केपी शर्मा ओली र पुष्पकमल दाहाल ‘प्रचण्ड’लाई संसद विघटन बदर भएपछिको परिस्थितिबारे छलफल गर्न गौतमले सचिवालय बैठक बोलाउन माग गरेका हुन् ।
‘नेपाल कम्युनिष्ट पार्टी (नेकपा) को उपाध्यक्षको हैसियतले म दुवै अध्यक्ष क. केपी शर्मा ओली र क. प्रचण्डसँग तुरुन्तै सचिवालय बैठक धुम्वाराहीस्थित पार्टीको केन्द्रीय कार्यालयमा बोलाउन अनुरोध गर्छु ।’ गौतमले आज सार्वजनिक गरेको प्रेस विज्ञप्तिमा उल्लेख छ ।
गौतमले राष्ट्रपति विद्यादेवी भण्डारीलाई सर्वोच्च अदालतको फैसलालाई स्वागत गर्दै प्रतिनिधि सभा अधिवेशन आह्वान गर्न र प्रधानमन्त्री केपी शर्मा ओलीलाई ढिला नगरी पदबाट राजीनामा दिन पनि सुझाव दिएका छन् ।
उनले सर्वोच्च अदालतले संसद विघटनलाई बदर गरेको फैसलालाई ऐतिहासिक भनेका छन् ।उनले संसद विघटन बदर भएको दिनलाई निरंकुशता, स्वेच्छाचारीता, अराजकता र दुराचारीताको पराजय भएको र संविधान, कानुन, लोकतन्त्र र जनताको सर्वभौमिकताले पुनर्विजय प्राप्त गरेको विज्ञप्तिमा उल्लेख गरेका छन् ।
पार्टी विभाजित भएको अवस्थामा गौतम कुनै पनि पक्षमा नलागि तटस्थ रहेका थिए । उनले पार्टी एक हुनुपर्छ भन्दै कुनै पनि समूहमा नलागेको बताउँदै आएका थिए ।