निर्वाचन आयोगले बोलायो चुनावको आचारसंहिताबारे छलफल गर्न सबै दललाई
चुनावको आचारसंहिताबारे छलफल गर्न निर्वाचन आयोगले आज सबै दलहरुलाई छलफलका लागि बोलाएको छ ।
निर्वाचन आयोगले आचारसंहिताको मस्यौदामा राय परामर्श लिन बिहान ११ बजे दलहरुलाई बोलाइएको जानकारी दिएको छ ।
निर्वाचन आचारसंहिताको मस्यौदा तयार पारिसकेको र सो मस्यौदाबारे राजनीतिक दलहरुसँग छलफल गर्न लागिएको आयोगले जनाएको हो ।
छलफलका लागि आयोगले प्रधानमन्त्री एवं नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’, कांग्रेस सभापति शेरबहादुर देउवासहित सबै पार्टीका अध्यक्ष तथा सभापतिहरुलाई बोलाएको छ ।
दलहरुसँग छलफल गरिसकेपछि निर्वाचन आचारसंहिता सार्वजनिक गर्ने आयोगले जनाएको छ ।
सरकारले प्रतिनिधिसभा विघटन गरी आगामी बैशाख १७ र २७ गते निर्वाचन मिति तोकेको छ । संसद् विघटनसँगै नेकपा विभाजित भएको छ ।
एउटा समुहको नेतृत्व प्रधानमन्त्री ओलीले र अर्को समुहको नेतृत्व दाहाल-नेपाल गरेका छन् । दुवै पक्षले आधिकारिक नेकपा आफूहरु नै रहेको दाबी गर्दै आए पनि निर्वाचन आयोगले आधिकारिकताको विवाद टुंगो लगाउन सकेको छैन ।
