कांग्रेस केन्द्रीय कार्यसमितिको बैठक आज बस्ने
नेपाली कांग्रेसको केन्द्रीय कार्यसमितिको बैठक आजबाट पुनः बस्दै छ ।
एक साताभन्दा बढी समय स्थगित गरिएको कांग्रेसको केन्द्रीय कार्यसमितिको बैठक आजबाट पुनः सुरु हुन लागेको हो । बैठक आज दिउँसो १ बजे पार्टी मुख्यालय सानेपामा बस्दै छ ।
संसद विघटन भएपछिको राजनीतिक परिस्थितिबारे छलफल गर्न कांग्रेसले पुस ७ गतेदेखि केन्द्रीय समिति बैठक सुरु गरेको थियो । सो बैठक १० गतेदेखि स्थगित गरिएको थियो ।
आजको बैठकमा संसद विघटनबारे बोल्न बाँकी केन्द्रीय सदस्यहरुले धारणा राख्ने क्रम जारी रहने कांग्रेसले जनाएको छ ।
यसअघिको बैठकमा केन्द्रीय सदस्यहरुले संसद विघटन असंवैधानिक र अलोकतान्त्रिक रहेको भन्दै आन्दोलनमा जानुपर्ने धारणा राखेका थिए तर सभापति शेरबहादुर देउवा भने संसद विघटन सम्बन्धी मुद्दा सर्वोच्चमा विचाराधीन रहेकाले आन्दोलनमार्फत् अदालतलाई दबाब दिन नहुने पक्षमा छन् ।