मन्त्रीपरिषद् बैठकद्वारा सगरमाथाको नयाँ उचाइ घोषणा गर्न स्वीकृति प्रदान
![](https://www.nagariktimes.com/wp-content/uploads/2020/11/mantriparisad-2.jpg)
बुधवार बसेको मन्त्रीपरिषद्को बैठकले सगरमाथाको नयाँ उचाइ घोषणा गर्न स्वीकृति प्रदान गरेको छ ।
सगरमाथाको नयाँ उचाइ घोषणा गर्नका निम्ति भूमि व्यवस्था, सहकारी तथा गरिबी निवारण मन्त्रालयलाई मन्त्रीपरिषद्ले स्वीकृति प्रदान गरेको हो ।
आर्थिक वर्ष २०६४/६५ बाट सुरु भएको सगरमाथाको उचाइ मापन कार्य अहिले सम्पन्न भएर घोषणा गर्ने चरणमा आएपछि सरकारले सगरमाथाको औपचारिक रूपमा घोषणाको तयारी गरेको मन्त्री अर्यालले जानकारी दिइन् ।
भूमि व्यवस्था मन्त्री पद्माकुमारी अर्यालले सगरमाथाको नयाँ उचाइ घोषणा गर्नका निम्ति स्वीकृति प्रदान गर्न मन्त्रीपरिषद्मा प्रस्ताव पेस गरेकी थिइन् ।
अर्याल भनिन्, ‘सरकारले पहिलो पटक आफ्नै स्रोतसाधनमा सगरमाथाको उचाइ मापन गरेको छ । त्यो कार्य अहिले सम्पन्न भएको छ । अब हामी आफैले नापेको सगरमाथाको उचाइ औपचारिक रूपमा घोषणा गर्ने चरणमा आइपुगेका छौ ।’
मन्त्रीपरिषद्बाट स्वीकृति प्रदान भइसकेपछि अब केही दिनमा कार्यक्रम बनाएर मन्त्रालयले औपचारिक रूपमा सगरमाथाको नयाँ उचाइ घोषणा गर्नेछ ।
सन् २०१५ मा गएको विनाशकारी भूकम्पका कारण मुलुकको उत्तरी भूभागमा रहेका स्थानहरूको उचाइमा असर परेको तथ्य नापी विभागको अध्ययनले देखाएको थियो ।
सोही सन्दर्भमा सगरमाथाको उचाइ पनि थपघट भएको हुनसक्ने भन्ने चर्चा चलेपछि नेपालले पहिलो पटक आफ्नै स्रोतसाधनमा सगरमाथाको उचाइ मापन गरेको हो ।
सन् २०१९ मा चीनका राष्ट्रपति सी चिङफिङको नेपाल भ्रमणका क्रममा सगरमाथाको उचाइ सँयुक्तरुपमा घोषणा गर्ने सहमति भएको थियो ।
सोहीबमोजिम नेपाल र चीनका सरकारी टोलीले संयुक्तरुपमा काम गरेका थिए ।यसअघि विभिन्न देशहरूले सगरमाथाको उचाइ मापन गर्दै आएका थिए ।
पछिल्लो पटक सर्वे अफ इण्डियाले सन् १९५४ मा मापन गरी उचाइ कायम गरिएको विश्वको सर्वोच्च शिखर सगरमाथाको उचाइ ८८४८ हालसम्म कायम रहिआएको छ ।