प्रचण्डले ओलीमाथि लगाएका गम्भीर आरोपसहितको प्रतिवेदन गाँउगाँउमा पुग्यो
नेकपाका कार्यकारी अध्यक्ष पुष्पकमल दाहालले सचिवालयमा पेस गरेको १९ पृष्ठ लामो राजनीति प्रतिवेदन किताबका रुपमा छापिएर गाँउ गाँउ पुग्दै छ ।
प्रधानमन्त्री एंव अध्यक्ष केपी ओलीले आफु विरुद्धको मिथ्या आरोपपत्र फिर्ता लिन माग गरिरहेको छ ।
तर कार्यकारी अध्यक्ष दाहालले भने यसलाई फिर्ता लिनुको साटो गाँउ गाँउमा कार्यकर्ताको हात पुर्याउनका लागि बुकलेटका रुपमा छापेर पठाएका छन् ।
दाहालको आरोपपत्रले पार्टी विभाजनसम्मको खतरा औंल्याइएका बेला बुकलेटको शीर्षक पार्टी एकता र पार्टी निर्माणका आधार नाम दिइएको छ । नेकपाको विधानमा दुवै अध्यक्षले एकीकृत प्रतिवेदन पेस गर्ने उल्लेख छ ।
दुई अध्यक्षले अलगअलग प्रतिवेदन पेस गर्ने परिकल्पना विधानले गरेको छैन । अझ कम्युनिष्ट पार्टीमा समानान्तर प्रतिवेदन पेश हुनु भनेको पार्टी विभाजनका लागि ढोका खुला हुनु हो । एकातिर विधान मिचेर र अर्कातिर मिथ्या आरोप लगाएर प्रतिवेदन बनाइएकाले यो छलफलको विषय नै हुननसक्ने ओली पक्षको धारणा रहँदै आएको छ ।
सुरुवातमा आरोपपत्र फिर्ता लिन माग गरेका ओलीले यसबारे माफी माग्नुपर्ने धारणा निकटस्थसँग राखेका छन् । दाहाल पक्ष कुनै पनि हालतमा आरोपपत्र फिर्ता नलिने र ओलीपक्ष यसको नाम नै सुन्न नचाहने अवस्थाले नेकपालाई थप जटिल मोडतर्फ पुर्याउने जानकारहरू बताउँछन् ।
