रुपन्देहीमा बुबाको चक्कु प्रहारबाट १९ वर्षीय छोराको मृत्यु
लुम्बिनी प्रदेश स्थित रुपन्देहीको तिलोत्तमा नगरपालिकामा बाबुले चक्कु प्रहार गर्दा १९ वर्षीय छोराको मृत्यु भएको छ ।
तिलोत्तमा नगरपालिका-११ गणेशनगरका ४३ वर्षीय शेरबहादुर गुरुङको चक्कु प्रहारबाट छोरा पदमबहादुर गुरुङको शनिबार साँझ मृत्यु भएको हो ।
बाबुको चक्कु प्रहारबाट पदमबहादुरको घटनास्थलमै मृत्यु भएको इलाका प्रहरी कार्यालय बुटवलका प्रमुख डीएसपी प्रतितसिंह राठौरले बताए ।
शेरबहादुरले मादक पदार्थ सेवन गरी श्रीमतीलाई जथाभावी गालीगलौज गरेका थिए । छोरा पदमबहादुरले आमालाई जथाभावी नबोल्न आग्रह गर्दा शेरबहादुरले चक्कु प्रहार गरेका थिए ।
इलाका प्रहरी कार्यालय बुटवलको टोलीले घटनामा संलग्न शेरबहादुरलाई शनिबार राति नै नियन्त्रणमा लिएर अनुसन्धान शुरु गरेको डीएसपी राठौरले जानकारी दिए ।
