विकासका आयोजना निरीक्षणका लागि संखुवासभाको किमाथांका पुगे प्रधानमन्त्री ओली
प्रधानमन्त्री केपी ओली विकासका आयोजना निरीक्षणका लागि संखुवासभाको उत्तरी छिमेकी चीनसँगको सीमावर्ती क्षेत्र किमाथांका पुगेका छन् ।
सीमासुरक्षा, कोसी करिडोर र अरुण तेस्रो जलविद्युत् आयोजनाको निरीक्षण गर्न प्रधानमन्त्री ओली आज किमाथांका गएका हुन् ।
उनीसँगै भौतिक पूर्वाधार तथा यातायातमन्त्री वसन्त नेम्वाङ, प्रदेश १ का मुख्यमन्त्री शेरधन राई, सशस्त्र प्रहरी महानिरीक्षक शैलेन्द्र खनाललगायत पनि चीनसँगको सीमा जोडिएको क्षेत्रमा गएका हुन् ।
उनले अरुण तेस्रो जलविद्युत् आयोजनाको अवलोकन गर्ने र किमाथांका भएर हुने अन्तरदेशीय व्यापारको सम्भाव्यताबारे अध्ययन गर्ने कार्यक्रमसमेत रहेको प्रधानमन्त्रीका प्रेस विज्ञ रामशरण बजगाईंले बताए ।
भ्रमण दलमा संखुवासभाबाट संघीय संसद्मा प्रतिनिधित्व गर्ने प्रतिनिधिसभा सदस्य राजेन्द्र गौतम र राष्ट्रिय सभा सदस्य परशुराम मेघी गुरुङ पनि छन् ।
पहिलोपटक बहालवाला प्रधानमन्त्री किमाथांकामा पुगेको र सो क्षेत्रको विकासका लागि प्रधानमन्त्री ओलीको भ्रमण महत्त्वपूर्ण रहेको बताइएको छ ।
बुधबार बिहान संखुवासभा गएका प्रधानमन्त्री ओली आजै काठमाडौं फर्किने कार्यक्रम छ ।