पार्टीभित्रको विवाद समाधान गर्ने उपाय खोज्दै ओली-प्रचण्ड
काठमाडौं : सत्तारुढ नेपाल कम्युनिष्ट पार्टी (नेकपा) भित्रको आन्तिरक विवाद कायम रहेकै बेला अध्यक्षद्वय केपी ओली र पुष्पकमल दाहालबीच शुक्रबार दुई घण्टा छलफल भएको छ ।
शुक्रबार बालुवाटारमा भएको छलफलमा दुई अध्यक्षले पार्टीमा देखिएको विवाद समाधानका उपायबारे आ-आफ्ना धारणा राखेको बताइएको छ । यद्यपि, दुबै पक्षले छलफलका विषय सार्वजनिक गरेका छैनन् ।
महिना दिनदेखि जारी रहेको स्थायी कमिटी बैठक त्यत्तिकै स्थगित गरिराखिएको छ भने केही नेताले केन्द्रीय कमिटी बोलाउन माग गरिरहेका छन् ।
केपी ओलीले प्रधानमन्त्री र पार्टी अध्यक्ष दुवै पदबाट राजीनामा गर्नुपर्ने माग दाहाल-माधव नेपाल पक्षले गरेपछि नेकपामा सत्ताको किचलो चरम बनेको छ ।
यद्यपि, पछिल्लो समय प्रधानमन्त्री ओलीले आगामी मंसिरमा अर्ली महाधिवेशन गर्ने र त्यसमा नेतृत्व परिवर्तन गर्न प्रस्ताव गरेपछि विवाद केही मत्थर भएझै देखिन्छ ।
स्वयं दाहाल पनि महाधिवेशनको प्रस्तावमा लचिलो बनेको जनाइएको छ । यस्तोमा देशभर बाढी पहिरोको अवस्था रहेको भन्दै स्थायी कमिटी स्थगन गरिएको थियो ।
