उपत्यकामा बिहानै बाट बर्षा, हिमपातसँगै देशभर चिसो बढ्योः मुस्ताङका खोलामा पानी जम्यो
पश्चिमी वायुको प्रभाव सँगै काठमाडौंमा बिहानै हल्का पानि परेको छ । यो सँगै देशैभरको जनजीवन प्रभावित भएको छ ।
हिमाली र उच्च पहाडी क्षेत्रमा हिमपात भएको छ । त्यस्तै भपश्चिम पहाडी र तराई क्षेत्रमा पानी परेको छ । आज उपत्यकामा मेघ गर्जनसहित पानी पर्ने मौसम पूर्वानुमान महाशाखाले जानकारी दिएको छ ।
भोलि देखि मौसममा सुधार हुँदै जाने पनि महाशाखाले जनाएको छ । यसपालिको पश्चिमी वायुको प्रणाली बलियो भएकाले अत्यधिक चिसो हुने छ । भोलिसाँझदेखि भने यसको प्रभाव घट्दै जानेछ ।
यसैबीच हिमपातका कारण डोल्पामा आजदेखि शुरु भएको वार्षिक परीक्षा प्रभावित भएको छ । डोल्पाका उपल्लो र मध्य भागमा बिहीबारदेखि भएको हिमपातले वार्षिक परीक्षामा सहभागी हुने विद्यार्थी समस्यामा परेका छन् ।
यस्तै चिसो बढेसँगै मुस्ताङका खोला तथा तालमा पानी जमेको छ ।उपल्लो मुस्ताङमा न्यूनतम तापक्रम माइनस १५ डिग्री सेल्सियस पुगेको छ । पानी जमेर धारामा आउन छाडेको छ ।
यस्तै आज बिहानैदेखि रुकुम पश्चिम र रुकुम पुर्व दुवै जिल्लामा पानी परिरहेको छ । भारी बर्षाले ह्वात्तै चिसो बढाएको छ ।
