प्रधानमन्त्रीको सरकारी निवास अगाडि निर्माण व्यवसायीको धर्ना
निर्माण व्यवसायीहरुले बालुवाटारस्थित प्रधानमन्त्रीको सरकारी निवास अगाडि धर्ना दिएका छन् ।
सरकारले सार्वजनिक खरिद नियमावली संशोधन गरेको विरोधमा आन्दोलित निर्माण व्यवसायीहरुले प्रधानमन्त्रीको सरकारी निवास अगाडि धर्ना दिएका हुन् ।
आफूहरुको हक विपरीत ऐन संशोधन भएको भन्दै निर्माण व्यवसायीहरुको छाता संगठन ‘नेपाल निर्माण व्यवसायी महासंघ’ले चरणबद्ध आन्दोलन घोषणा गरेको हो । सोही क्रममा निर्माण व्यवसायीहरु मंगलबार बिहान प्रधानमन्त्री निवास अगाडि धर्नामा सहभागी भएका हुन् ।
कालोसूचीमा परेका तथा भ्रष्टाचारमा मुछिएका ठेकेदारलाई सार्वजनिक बोलपत्रमा सहभागी हुन नदिनेगरी सरकारले सार्वजनिक खरिद ऐन संशोधन गरेको हो । केही दिन यता धर्ना कार्यक्रम गर्दै आएका उनीहरुले माग पूरा नभए काम ठप्प पार्ने चेतावनीसमेत दिएका छन् ।
