रोहितको कप्तानीमा युएईविरुद्ध नेपालको फराकिलो जित
श्रीलंकाको मारियन्स क्रिकेट ग्राउण्डमा जारी एसीसी यू १९ एसिया कप क्रिकेटमा नेपालले फराकिलो जित हासिल गरेको छ । कप्तान रोहितकुमार पौडेलको कप्तानी पारीमा एसिसी यु(१९ एसिया कप क्रिकेटमा नेपालले युएईलाई १६० रन हराउँदै फराकिलो अन्तरले जित हात पारेको हो ।
मंगलबार श्रीलंकाको मारियन्स क्रिकेट ग्राउण्डमा टस हारेर ब्याटिङको निम्तो पाएको नेपालले युएईलाई २८५ रन लक्ष्य दिएको थियो । नेपालले दिएको विशाल लक्ष्य पछ्याउँदै ब्याटिङ गरेको यूएईले ३४.४ ओभरमा सबै विकेट गुमाएर १२५ रन मात्रै बनाउन सक्यो ।
यूएईका लागि व्रित्य अरविन्दले सर्वा्धिक २८ रन जोडे । बलिङतर्फ नेपालका सागर ढकालले ३ विकेट लिँदा, राशिद खान, पवन सर्राफ र सूर्य तामाङले समान २/२ विकेट लिए । नेपालका लागि कप्तान पौडेलले ६७ रन बनाए । आशिफ शेखले ४५ र सन्दीप जोराले ४८ रन बनाएका थिए । राशिद खानले ४४ र कमलसिंह ऐरीले ४१ रन जोडे भने कुशल मल्ल २२ रनमा आउट भए ।
युएईका लागि आकाश ताहिर र सञ्चित शर्माले समान ३/३ विकेट लिएका थिए । उसका पालिनियापन मेयाप्पनले २ विकेट लिएका थिए ।
