भारतका चर्चित वकिल तथा पूर्व कानून मन्त्री राम जेठमलानी रहेनन्
भारतका चर्चित वकिल तथा पूर्व कानून मन्त्री राम जेठमलानीको आज आइतबार बिहान निधन भएको छ । भारतीय बार काउन्सिलको अध्यक्ष रहेका जेठमलानीको ९५ वर्षको उमेरमा निधन भएको हो ।
उनको आइतबार बिहान निधन भएको पारिवारका सदस्यले जानकारी दिएको भारतीय सञ्चारमाध्यमले जनाएका छन् । सन् १९२३ को सेप्टेम्बर १४ मा जन्मेका ठमलानी अटल बिहारी बाजपेयीको सरकारमा कानून मन्त्री पनि रहेका थिए । उनको जन्मस्थान हाल पाकिस्तानमा पर्छ, तर भारत–पाकिस्तान विभाजनका बेला उनी भारत आएका थिए ।
जेठमलानीले धेरै हाई प्रोफाइल आपराधिक मुद्दामा वकालत गरेका थिए र यसले उनलाई प्रशिद्धि पनि दिलाएको थियो । १७ वर्षको उमेरमा कानूनको डिग्री लिएका सन् १९५९ मा नानावती केसमा वकालत गरेर आफ्नो पहिचान स्थापित गरेका थिए ।
उनी क्रिमिनल ल का प्रतिष्ठित वकिल हुन् । उनका दुई छोरी र दुई छोरा छन् । त्यसमध्ये महेश जेठमलानी र रानी जेठमलानी चर्चित वकिल हुन् ।
सन् २०१४ को चुनावअघि जेठमलानीले नरेन्द्र मोदीलाई प्रधानमन्त्री बनाउने प्रस्तावको समर्थन गरेका थिए । तर मोदी प्रधानमन्त्री बनेको केही समयपछि नै उनी मोदीका विरोधी बनेका थिए । उनी सन् २०१७ सम्म वकालतमा सक्रिय थिए ।
