प्रधानमन्त्री स्वदेश फर्किँदा १ घण्टा उडान ठप्प , एयर ट्राफिक जाममा परे रवीन्द्र मिश्र
काठमाडौं : प्रधानमन्त्री केपी शर्मा ओली स्वदेश आउँदा भएको एयर ट्राफिक जामको मारमा साझा पार्टीका संयोजक रवीन्द्र मिश्र पनि परेका छन् ।
ओली आज (शुक्रबार) मध्याह्न १२:३० बजेतिर काठमाडौं आइपुगेका हुन् । प्रधानमन्त्रीको विमान काठमाडौंमा अवतरण हुनुभन्दा १ घण्टा अगाडिदेखि त्रिभुवन अन्तर्रा्ष्ट्रिय विमानस्थलमा सबै उडान तथा अवतरण ठप्प पारिएको थियो ।
उक्त विषयलाई लिएर मिश्रले सामाजिक सञ्जाल ट्वीटरमार्फत आक्रोश पोखेका छन् । काठमाडौंबाट विराटनगरका लागि विमान चढेका मिश्रले १ घण्टादेखि विमानमै बस्नु परेको भन्दै ट्वीटर सन्देशमा मिश्रले भनेका छन्-
ओली जाम:
बिराटनगर जान प्लेनमा बसेको १ घण्टा भयो। प्रधानमन्त्री ओलीको विमान अवतरण गर्न अर्को आधा घण्टा लाग्छ रे। हाम्रोमात्र होइन,सिङ्गो विमानस्थलको हाल यही छ। नेपाल भ्रमण वर्ष शुरू गर्नु अगाबै VVIP उडानका बेला विमानस्थल व्यवस्थापनको तालिम गर्न हुन विशेष अनुरोध छ। @yogesbhattarai— Rabindra Mishra (@RabindraMishra) September 6, 2019