स्वराजको निधनप्रति प्रधानमन्त्री ओलीद्वारा दुःख व्यक्त “उहाँले आत्मीयतापूर्वक भाइ बोलाउनु हुन्थ्यो”
काठमाण्डौ : प्रधानमन्त्री केपी शर्मा ओलीले भारतीय जनता पार्टी (भाजपा) की नेतृ तथा पूर्व विदेशमन्त्री सुषमा स्वराजको निधनप्रति दुःख व्यक्त गर्नुभएको छ ।
प्रधानमन्त्री ओलीले बुधबार बिहान ट्वीटमार्फत स्वराजको निधनमा दुःख व्यक्त गर्नुभएको हो ।
प्रधानमन्त्री ओलीले बुधबार बिहान दुई वटा ट्वीट गर्दै भन्नुभएको छ ‘भारतकी पूर्व विदेशमन्त्री तथा वरिष्ठ राजनीतिक नेतृ सुषमा स्वराजको निधनको खबरले स्तब्ध भएको छु ।
यस दुखद् घडीमा भारत सरकारका साथसाथै सम्पूर्ण भारतीय नागरिक तथा शोक सन्तप्त परिवारप्रति हार्दिक समवेदना व्यक्त गर्दछु ।’
साथै प्रधानमन्त्री ओलीले सुषमा स्वराजसँग व्यक्तिगत रुपमा पनि आफ्नो राम्रो सम्बन्ध भएको बताउनुभएको छ । उहाँ लेख्नहुन्छ ‘मलाई सम्झना छ, उहाँले आत्मीयतापूर्वक मलाई भाइ भनेर बोलाउनु हुन्थ्यो । उहाँले आत्मीयतापूर्वक आफ्ना भावना बाँड्नुहुन्थ्यो ।’
भारतकी पूर्व विदेशमन्त्री एवं सत्तारुढ भारतीय जनता पार्टी भाजपाकी वरिष्ठ नेत्री सुषमा स्वराजको मंगलबार राति निधन भएको हो ।
उहाँको ६७ वर्षको उमेरमा निधन भएको हो । उहाँको मंगलबार राति दिल्लीको एम्स अस्पतालमा निधन भएको भारतीय संचार माध्यमले जनाएका छन् । उहाँलाई मुटुसम्बन्धी समस्या भएपछि अस्पताल लगिएको थियो ।
स्वराजको पार्थिव शरीर बुधबार दिउँसो ३ बजेदेखि अन्तिम श्रद्धाञ्जलीको लागि पार्टी कार्यालयमा राखिनेछ । त्यसपछि ४ बजे राष्ट्रिय सम्मानका साथ अन्त्येष्टि गरिने भारतीय जनता पार्टीले जनाएको छ ।
