Logo
६ बैशाख २०८१, बिहीबार
(May 9, 2019)

‘सामाजिक उत्तरदायित्वका लागि पत्रकारिता’

राष्ट्रपति मडुरोका विरोधी भेनेजुयाली संसदका उपाध्यक्ष गाडीबाटै पक्राउ

एजेन्सी : भेनेजुयलाको गुप्तचर एजेन्सीले प्रमुख विपक्षी नेता एडगर जाम्ब्रानोलाई पक्राउ गरेको छ ।

पक्राउ गर्ने क्रममा एडगर गाडीबाट बाहिर निस्कन नमानेपछि, उनी सवार गाडीलाई तानेर लगिएको थियो । अघिल्लो हप्ता निकोलस मडुरोलाई पदच्युत गर्न गरिएको सैन्य विद्रोहको असफल आह्वानपछिको यो पहिलो प्रमुख पक्राउ हो ।

एड्गर विपक्षीको बहुमत रहेको भेनेजुयलाको संसद राष्ट्रिय सभाका उपाध्यक्ष हुन् । पक्राउको खबर एड्गर आफैंले ट्वीटरमार्फत सार्वजनिक गरेका हुन् । एड्गरका अनुसार देशको गुप्तचर एजेन्सी ‘सेविन’ ले उनलाई पार्टी मुख्यालयबाट पक्राउ गरेको हो ।

“गाडीबाट झर्न नमानेपछि तिनले एक गाडी तान्ने वाहन ल्याएर हामीलाई जबरजस्ती सेविनको मुख्यालयमा स्थानतरण गरे,” उनले भने । भेनेजुयलाको संविधान–सभाले मंगलबार एड्गर र अन्य पाँचलाई सांसदको रुपमा प्रदान गरिँदै आएको सुरक्षा विशेषाधिकार रद्द गरेको थियो । तिनलाई भावी दिनमा गरिने कारबाही सहज पार्न त्यसो गरिएको थियो ।

भेनेजुयलामा हाल दुईवटा संसद अस्तित्वमा छन् । नेसनल एसेम्बलीमा बहुमत गुमाएपछि मडुरोले संविधान–सभा गठन गरेर समानान्तर संसदको अभ्यास सुरु गराएका छन् । संविधान सभा मडुरो समर्थक छ ।

अप्रिल ३० मा संसदका अध्यक्ष र स्वघोषित राष्ट्रपति हुवा ग्वाइडोले सेनालाई मडुरोविरुद्ध उभिन आह्वान गरेका थिए । तर आह्वान अनुरुप सेना अघि नआएपछि प्रयास असफल भयो । मडुरो पक्षधरले विपक्षीको कदमलाई ‘कु’ प्रयास भनिरहेका छन् ।

“‘कु’का एक प्रमुख योजनाकार पक्राउ परेका छन्,” संविधान सभाका प्रमुख डियोस्डाडो क्याबेलोले सरकारी मिडियासँग बोल्दै भने ,“तिनले असफल ‘कु’ प्रयासको लागि अदालतमा मूल्य चुकाउनुपर्नेछ ।” विपक्षी दलका नेताको पक्राउलाई स्वघोषित राष्ट्रपतिले अपहरणको संज्ञा दिएका छन् ।

भेनेजुयलाको संविधान-सभाले यस अघि नै ग्वाइडोको पनि संसदीय सुरक्षा हटाइसकेको छ । तर अमेरिकाले पूर्ण समर्थन व्यक्त गरेकाले उनीविरुद्ध भने हालसम्म कुनै कदम उठाइएको छैन । संचारमाध्यमका अनुसार हालसम्म विपक्षी दलका १५ सांसदलाई दिइदैँ आएको विशेषाधिकार रद्द गरिएको छ । तीमध्य तीनजना पक्राउ परिसकेका छन् ।

प्रकाशित मिति: May 9, 2019

प्रतिक्रिया दिनुहोस्