किन गायब छन् कपिल शर्मा शोबाट ‘चन्दू चायवाला’
कपिल शर्माको शोमा चन्दू चायवालाको भूमिका निभाउने चन्दन प्रभाकर दोस्रो सिजनमा देखिएका छैनन् । यसै कारण उनको अनुपस्थितीमा चन्दनका थुप्रै प्रशंसकले चासो व्यक्त गरिरहेका छन् ।
हालै महाशिवरात्रीको अवसरमा जब चन्दनले सोसल मिडियामा आफ्ना प्रशंसकका लागि पोष्ट गर्दा धेरैले उनलाई कपिल शर्माको शोमा कहिले फिर्ता हुने भनेर प्रश्न सोध्न थाले । उनको इन्स्टाग्राम प्रोफाइलमा एउटा कमेन्ट थियो, ‘ह्याप्पी महाशिवरात्री चन्दन जी । तपाईं एक लेजेन्ड हुनुहुन्छ । तपाईं जस्तो हुनुहुन्छ, हामीलाई त्यही नै मनपर्छ । तपाईंको मुस्कानले हामीलाई खुसी दिन्छ र तपाईं हामीलाई धेरै हँसाउनुहुन्छ । प्लिज तपाईं कपिल शर्मा शोमा फिर्ता हुनुहोस् किनभने हामी तपाईंलाई धेरै नै मिस गरिरहेका छौं । हामी सबै तपाईंलाई धेरै मन पराउँछौं ।’
धेरैले उनको अनुपस्थितीमा प्रश्न गरिरहेका थिए, त्यसकारण उनले यसबारे मुख खोलेका छन् । उनले एक प्रशंसकको कमेन्टको जवाफ दिँदै भने, ‘हेलो एकता । तपाईंको प्रेमको लागि धन्यवाद । म कुनै पनि एपिसोडलाई जानीजानी छोडिरहेको छैन । तर सायद मेरो भूमिकाले त्यस्तो विशेष प्रभाव पार्न सकिरहेको छैन त्यसकारण उनीहरु मलाई एपिसोडमा लिइरहेका छैनन् । तपाईंलाई मेरो तर्फबाट धेरै माया र शुभकामना ।’
कपिल शर्माको कार्यक्रमले टिआरपी रेटिङमा निकै राम्रो प्रदर्शन गरिरहेको छ । पहिलो सिजनमा आफ्नो कमेडीले मानिसहरुको मन जित्ने सुनिल ग्रोवरले सायद यो कार्यक्रममा फिर्ता हुनसक्छन् । तर यसबारे अहिले नै केही आधिकारिक बयान सार्वजनिक भएको छैन ।
