संसदीय समितिका लागि राष्ट्रिय सभाबाट तीन जनाको नाम सिफारिस
काठमाडौं, २२ असार : राष्ट्रिय सभाबाट संसदीय सुनुवाई समितिका लागि तीन जनाको नाम सिफारिस गरिएको छ । १५ सदस्यीय सुनुवाई समितिमा राष्ट्रिय सभाबाट तीन जनाको नाम सिफारिस गरिएको हो ।
सांसदहरू सुमनराज प्याकुरेल, नन्दा चपाई र जितेन्द्रनारायण देवको नाम राष्ट्रिय सभाबाट सिफारिस गरिएको छ । प्याकुरेल, चपाई सत्तारुढ नेकपाका सांसद हुन् भने देव प्रतिपक्षी दल नेपाली कांग्रेसका सांसद हुन् ।
प्रतिपक्षी दल कांग्रेसले समितिमा बस्ने सांसदको नामावली नबुझाएपछि बिहीबारको संसद बैठकमा सभामुख कृष्णबहादुर महराले तीन दिन भित्र नाम बुझाउन‘अल्टिमेटम’ दिएका थिए ।
कांग्रेसले समितिका सभापतिमा भागबण्डा गर्न माग गर्दै नामावली बुझाउन नमानिरहेको थियो । संसदीय समितिका बाँकी १२ जनाको नाम प्रतिनिधि सभाबाट सिफारिस हुने व्यवस्था छ ।
