शिक्षक सेवा आयोगका अध्यक्षलाई बर्खास्त गर्न प्रधानमन्त्री तथा मन्त्रिपरिषदको निर्देशन
काठमाडौं : प्रधानमन्त्री तथा मन्त्रिपरिषदको कार्यालयले शिक्षक सेवा आयोगका अध्यक्ष ताना गौतमलाई कारवाही गर्न शिक्षा मन्त्रालयलाई निर्देशन दिएको छ । प्रधानमन्त्री कार्यालयले चैत २१ गते बुधवार एक पत्र लेखि शिक्षा, विज्ञान तथा प्रविधि मन्त्रालयलाई आयोगका अध्यक्ष गौतमलाई आवश्यक कारवाही गर्न आदेशानुसार अनुरोध गरेको हो ।
शिक्षक सेवा आयोगका अध्यक्ष गौतमले सर्वोच्च अदालतमा झुठो प्रमाण पेश गर्दा हजारौं शिक्षक लाइसेन्स, शिक्षा विषय र तालिम नभएका साथै लियन राख्ने बस्ने शिक्षक परीक्षाको फारम भर्नबाट बञ्चित भएका भन्दै गौतमसहित आयोगका पदाधिकारीहरुलाई कारवाही गर्न माग गर्दै जनप्रभात मावि कालिमाटीका अस्थायी शिक्षक शरद कुमार मिश्रले ०७४ साउन ११ मा प्रधानमन्त्री तथा मन्त्रिपरिषदको कार्यालयमा निवेदन दिएका थिए ।
उनको निवेदनको सुनवाई गर्दै प्रधानमन्त्री कार्यालयले शिक्षक सेवा आयोगका अध्यक्षसहितका सबै पदाधिकारीलाई कारवाही गर्न निर्देश गरेको हो । प्रधानमन्त्री कार्यालयले ०७४ साउन २३ मा अध्यक्ष गौतम लगायत पदाधिकारीहरुलाई आवश्यक कार्बाही गर्न शिक्षा मन्त्रालयमा पत्र पठाएको थियो ।
शिक्षा मन्त्रालयले गौतमलाई कारवाही प्रक्रिया अघि नबढाएपछि पुनः मिश्रले चैत १८ गते प्रधानमन्त्री कार्यालयमा कारवाहीका लागि निवेदन दर्ता गराएका थिए । सो चैत्र १८ को पत्र पछि प्रधानमन्त्री तथा मन्त्रिपरिषदको कार्यालयले चैत २० गते चलानी नम्बर ४७८९ को पत्र लेखि शिक्षा मन्त्रालयलाई आयोगका अध्यक्ष गौतमसहितकापदाधिकारीलाईआवश्यक कारवाही गर्न निर्देशन दिएको हो ।
