वाम गठबन्धन नरहने घोषणा : प्रभु साहको सक्रियतामा प्रचण्डलाई ५५ किलोको माला
रौतहट : नेकपा माओवादी केन्द्रका अध्यक्ष एवं पूर्व प्रधानमन्त्री पुष्पकमल दाहाल प्रचण्डले अब बाम गठबन्धन नरहने बताएका छन् । कार्यक्रममा पूर्वमन्त्री प्रभु साहको सक्रियतामा स्थानीयबासीले दाहाललाई ५५ किलोको फूलको माला लगाएका छन् । रौतहटको जंगलसैयामा कटहरिया–जंंगलसैया–धनसर सडक खण्डको उद्घाटन गरेपछि जंगलसैयामा आयोजित कार्यक्रमलाई सम्बोधन गर्दै उनले २०१९ सालदेखि नेपालमा कम्युनिष्ट पार्टीमा फुटबादको रोग सुरु भएकोले कम्युनिष्टहरु क्षतविक्षत अवस्थामा रहँदै आएकोमा अब एउटै बलियो कम्युनिष्ट पार्टीको निर्माण गरी देशलाई शान्ति तथा समृद्धिको बाटोमा लैजाने बताए ।
एमाले र माओवादी केन्द्र मिलेर बनेको वाम गठबन्धनले आम निर्वाचनमा करिब दुई तिहाई बहुमत ल्याइसकेको र पार्टी एकीकरणको अन्तिम चरणमा रहेको बताउँदै नेता दाहालले एउटै कम्युनिष्ट पार्टी बनिसकेकोले वाम गठबन्धन नरहने बताए । देशमा राजनीतिक लडाईँको युग समाप्त भइसकेको बताउँदै उनले अबको लक्ष्य भनेको विकास, सुशासन र समृद्धि रहेको बताएका छन् । त्यसक्रममा दाहालले धनसर–जंगलसैया १४ किलोमिटर लामो सडकको शुभारम्भ गरेका छन् ।
पूर्वमन्त्री साहको सक्रियतामा जिल्ला वन कार्यालय, जिल्ला प्राविधिक कार्यालय, कटहरिया नगरपालिका तथा स्थानीयबासीको सहयोगमा प्रदेश सभा सदस्यद्वय नागेन्द्र यादव र कुन्दन कुशवाहाको विशेष पहलमा डेढ महिनाको अवधिका बिना कुनै बजेट १४ किलोमिटर सडक निर्माण भएर सुचारु हुनुलाई नेता दाहालले चमत्कारको संज्ञा दिँदै तीव्र विकासको अवधारणालाई अगाडि सारेका छन् ।
कार्यक्रमलाई सम्बोधन गर्दै पूर्वमन्त्री साहले रौतहटको क्षेत्र नम्बर ३ लाई सडक पूर्वाधार, उद्योग, पर्यटन र भारतसित सम्पर्क गराउन आफू लागी परेको बताएका छन् । सर्वधारण नागरिकको सहयोग भएमा जस्तो सुकै कठिन काम पनि गर्न सकिने उदाहरण प्रस्तुत गर्दै साँसद साहले वाम गठबन्धनले देशमा विकासको चाहनालाई पूरा गर्ने बताएका छन् ।
