नारायणकाजीलाई जिताउन बाबुरामलाई हराउन उपेन्द्र गोरखामा
गोरखा : नयाँशक्ति पार्टीका अध्यक्ष तथा पूर्वप्रधानमन्त्री बाबुराम भट्टराईसँग गोरखा–२ मा प्रतिस्पर्धा गरेका माओवादी केन्द्रका बरिष्ठ नेता नारायणकाजी श्रेष्ठले भट्टराई शैक्षिक प्रतिस्पर्धी डा उपेन्द्र देवकोटाकोे साथ पाएका छन् ।
गोरखा–२ मा उमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ को उपस्थितिमा भएका सभाहरुमा डा देवकोटाले पनि श्रेष्ठका पक्षमा मत मागेका छन् ।
डा देवकोटा बुधबार विहान ओलीसँगै गोरखा पुगेका हुन् । गोरखा–२ को भच्चेकमा एमाले–माओवादी केन्द्रको चुनावी सभामा पुगेका ओली र प्रचण्डसँगै डा देवकोटा मञ्चमा देखिएका छन् ।
डा. भट्टराई र डा देवकोटा दुवैले २०२६ मा सँगै एसएलसी दिएका थिए । नतिजामा भट्टराई ‘बोर्डफष्ट’ भए भने देवकोटा बोर्डमा पाँचौं नम्बरमा परेका थिए ।
डा. भट्टराई इन्जिनियरिङ र राजनीतिमा चर्चित भए भने देवकोटा चिकित्सा क्षेत्रमा सकृय छन् । गोरखाको सामाजिक–राजनीतिक क्षेत्रमा डा भट्टराईको जत्तिकै पकड डा.देवकोटाको पनि रहेको मानिन्छ ।
डा. देवकोटाको साथ पाएपछि भट्टराईसँगको कठिन प्रतिस्पर्धामा श्रेष्ठलाई केही राहत पुगेको माओवादीका कार्यकर्ताहरू बताउँछन् ।
