भारतविरुद्ध प्रदर्शन: भारतिय प्रधानमन्त्री मोदीको पुत्ला दहन
काठमाडौं, २७ फागुन । कञ्चनपुरको पुर्नवासमा भारतीय सुरक्षाबल एसएसबीको गोली प्रहारबाट निधन भएका गोविन्द गौतमको विषयलाई लिएर देशभर बिरोध प्रदर्शन भएको छ ।
कञ्चनपुरमा स्थानियले व्यापक बिरोध प्रदर्शन गरेका छन् भने राजधानीका विभिन्न ठाउँमा बिरोध सभा गरेर भारतीय प्रधानमन्त्री नरेन्द्र मोदीको पुत्ला दहन गर्नुका साथै भारतीय झण्डासमेत जलाएका छन् ।
त्यस्तै, भारतीय सीमा सुरक्षा बल (एसएसबी)ले कञ्चनपुरका गौतमलाई गोली हानेर हत्या गरेको विरोधमा विद्यार्थीहरुले भारतीय दूतावास अगाडि प्रदर्शन गरेका छन् ।
अस्कल क्याम्पस अगाडि भेला भएर विद्यार्थीहरु लैनचौरस्थित भारतीय दूतावास तर्फ अघि बढेका थिए । उनीहरुले गौतमको हत्याको विरोध गर्दै भारतविरुद्ध चर्का नाराबाजी गरेका थिए । शुक्रबार बिहान काठमाडौंमै माओवादी केन्द्रका भ्रातृ संस्थाहरुले विरोधसभा गरेका थिए ।