सुराकी परिचालन गरेर गाँउ–गाँउमा नक्कली नागरिकताधारीको खोजी तिब्र
इनरुवा । सुनसरी जिल्लाबाट झुट्ठा विवरण पेश गरि नेपाली नागरिकता बनाउनेहरुको संजालको खोजीमा सुरक्षा निकायले अप्रेशन शुरु गरेको छ । सुनसरी जिल्लामा आएर पैसा खर्च गरि नेपाली नागरिकता बनाएको घटना एकपछि अर्को सार्वजनिक हुन थालेपछि सुरक्षा निकायले गाँउ गाँउमा सुराकी परिचालन गरेर त्यस्ता नागरिकताको खोजी शुरु गरेको हो । पछिल्लो समयमा बंगलादेशी नागरिकले नक्कली विवरण पेश गरेर नागरिकता र राहदानी जिल्ला प्रशासन कार्यालयबाट बनाएको तथ्य फेला परेसँगै यसको ठूलो सञ्जाल सुनसरीसहित तराईका जिल्लाहरुमा सक्रिय रहेको आशंकामा सुरक्षा निकायले आफ्नो सक्रियता बढाएको हो ।
उच्च सुरक्षा स्रोतका अनुसार सुरक्षा निकायले शुरु गरेको अप्रेशनमा व्यापक रुपमा गैर नेपाली नागरिकहरुले कहिले देखी सुनसरीमा बसोवास गरेका हुन उनीहरुले कहाँ कुन कुन स्थानमा घर जग्गा लगायतका भौतिक सम्पत्ति खरिद आर्जन गरेका छन, नेपाली नागरिकताको प्रमाणपत्र कहिले कसरी कस्को सिफारिसमा लिएका हुन, उनीहरुको नेपालमा पारिवारिक नाता सम्बन्धको जालो र जिल्ला प्रशासन कार्यालय सुनसरीमा कार्यरत कर्मचारीहरुको संग्लनता लगायतका विषयमा केन्द्रीत रहेर पहिलो चरणमा खोजी कार्य शुरु गरेको हो ।
एक सुरक्षा अधिकारीले भने सुनसरी जिल्लाबाट हालसम्म नेपाली नागरिकता बनाउने गैर नेपाली नागरिकहरु बारे सूचना दिने मानिसको नाम ठेगाना गोप्य राख्ने नीतिसँगै जोकोहीले गोप्य सुचना नाम नराखी दिन सक्ने रणनिती अख्तियार गरेकाले धेरै सूचना आईरहेको जानकारी दिए । यस्तो सूचना हुलाकबाट समेत नाम पठाउन सकिने , त्यस्ता मानिसहरुको फोटो हुलिया नाम वतन खुलाई पठाएमा गम्भीरतापुर्वक छानविन गरिने ति सुरक्षा अधिकारीले बताए ।
जिल्ला प्रशासन कार्यालय सुनसरीबाट मुस्लिम आतंकवादी संगठन ‘इन्डियन मुजाहिद्दिन’ का चार लडाकुले नेपाली नागरिकता र पासपोर्ट लिएका थिए । इन्टरपोलको ‘मस्ट वान्टेड’ सूचीमा रहेका सलमान शेख, डा. सहनवाज, वादा साजिद, मोहम्मद खालिद र अबु रसिदले सुनसरीको नरसिंह गाविस ७ मा स्थायी बसोबास भएको नक्कली कागजात बनाई डा. सहनवाजले सहनवाज मियाँ, अबु रसिदले मोहम्मद अहमद हुसैन मियाँ, सलमान शेखले मोहम्मद फहद अन्सारी र मोहम्मद खालिदले इर्शाद अन्सारीको नाममा नागरिकता र पासपोर्ट बनाएका थिए ।
सहनवाज मियाँ र अहमद हुसेनले मोहम्मद समिम मियाँलाई बाबु बनाएका थिए भने इर्शाद आलम र फहद अन्सारीले मिसर मियाँको छोरा बनेका थिए । मोहम्मद समिम र मिसर मियाँ सुनसरी नरसिंह गाविस ७ का स्थायी बासिन्दा हुन । उनीहरू भुटाहा ५ का खुर्सिद आलम अन्सारी नागरिकता दिलाउन भूमिका निर्वाह गरेपनि हालसम्म कारवाही हुन सकेको छैन । यसै गरि सुनसरी प्रशासनबाटै बंगलादेशी नागरिक हयात मियाँ भन्ने आसान मियाँ र समशेर भन्ने सिजारोल मल्लिक नागरिकताको प्रतिलिपी पश्चिमकुशाहा गाविसको स्थायी बासिन्दाका नामबाट जाली नागरिकता फेला परेको थियो ।
परराष्ट्रबाट जारी भएको राहदानीमा १०००५३८४३ नं को हयात मियाँ उल्लेख भै आएको छ भने १०००५३८१३ नं को राहदानीमा समशेर मियाँ उल्लेख भै आएको थियो । सुनसरी प्रहरीले अनुसन्धान पुरा नभएको भनी सार्वजनिक नगरिएका चार जना बंगलादेशीहरु मोहमद फरहाज मियाँ, मेहदी हसन, हारुन मियाँ , जुयल मियाँलाई समेत सोही काण्डमा पक्राउ छन । सुनसरीमा यस्ता घटना सार्वजनिक हुँदै आएको छ । आसामको बोडो आतंकबादीका नेता निरञ्जन होजाईले धरानबाट निर्मल राईको नाममा नेपालको नागरिकता बनाएका थिए ।
भने त्रिभुवन अन्तर्राष्ट्रिय विमानस्थलबाट पक्राउ परेका मोष्टवाण्टेडको सूचिमा रहेका भारत, बिहार राज्यको मधुवनी जिल्लाअन्तर्गत लौकहा बगमरिया घर भएका मोहम्मद मुस्तकिम भनिने रइस मियाँले सुनसरी जिल्लाको हरिपुर र सप्तरीबाट अलग अलग नामबाट नागरिकता लिएको तथ्य फेला परेको थियो । विभिन्न मुलुकका कुख्यात अपराधीसँग सुनसरी जिल्ला प्रशासन कार्यालयबाट लिएको नेपाली नागरिकता तथा राहदानी फेला परेका थुप्रै घटना छन् । २०६९ कात्तिक २३ गते सुनसरीको झुम्का कारागारबाट सुरुङ खनेर भाग्न सफल अधिकांश भारतीय र बंगलादेशी अपराधीसँग नेपाली नागरिकता र राहदानी थियो ।
इन्टरपोलको रेडकर्नर नोटिसमा परेका बंगलादेशी नागरिक सुव्रत बेनले नेपालमा असरफ अली अन्सारीका नामबाट नागरिकता र राहदानी लिएका थिए । सुनसरी, सिमरिया–५ बाट नागरिकता लिएका उनी बंगलादेशका ‘कुख्यात’ अपराधी हुन् । बेनसँगै झुम्का कारागारबाट भाग्न सफल भारतीय कुख्यात अपराधी धीरेन्द्र यादवले सप्तरी र सुनसरीका दुई गाविसबाट फरकफरक नाममा नेपाली नागरिकता लिएका छन् ।
भारत, बिहार राज्यअन्तर्गत सुपौल, चिकनीपट्टी निवासी यादवले २०६७ फागुन १२ मा खटिएको नागरिकता टोलीसँग सप्तरी, वभनगामाकट्टी २ र सुनसरीको पश्चिम कुशाहा १ बाट नागरिकता लिएका छन् ।
यादवले वभनगामाकट्टी–२ निवासी शंकर यादवलाई बुबा उल्लेख गरी महावीर यादवका नामबाट नागरिकता लिएका हुन् । त्यस्तै पश्चिम कुशाहा–१ बाट लिएको नागरिकतामा उनको नाम महेश यादव उल्लेख छ । बिहार, सुपौल जिल्लाअन्तर्गत सीतापुरनिवासी सुभाष झाले सुनसरी, हरिपुरबाट हरिश्चन्द्र झाका नाममा नेपाली नागरिकता लिएका थिए । त्यस्तै बिहार, सुपौलअन्तर्गतकै त्रिवेणीगन्जका बमबम यादव सुनसरी, हरिपुरबाट नागरिकता लिएका थिए ।
