बैंकका एटीएम नियमित खुला, सकभर विद्युतीय कारोबार गर्न बैंकर्स सङ्घको अनुरोध
कोरोना संक्रमणबाट बच्नको लागि सरकारले यतिबेला देशभर लकडाउन घोषणा गरेको छ । सो लकडाउन समयमा पनि बैंकका एटीएम नियमित खुलिरहेका छन् ।
नेपाल बैंकर्स सङ्घले सबै बैंकका एटीएम चलेको नियमित रुपमा पैसा राख्ने काम भइरहेको जनाएको छ ।अहिले बैंक तथा वित्तीय संस्थामा तीन हजार ६ सय ६२ वटा एटीएम सञ्चालनमा छन् ।
तर एटीएम बुथ नभएका बैंकका शाखाहरु सीमित समयको लागि मात्रै खुल्ने भएका छन । यसको लागि पनि सम्बन्धित ठाउँको प्रशासनसँग अनुमति लिनुपर्नेछ ।
बैंकर्स सङ्घले आफ्ना सदस्य बैंकहरुलाई एटीएम नभएका शाखा हरेक दिन ११ बजेदेखि १ बजेसम्म खोल्न निर्देशन दिएको छ ।
तर लकडाउनको बेला बाहिर निस्कन नपाइने भएकाले सकभर डिजिटल बैंकिङको प्रयोग बढाउन पनि सङ्घले आग्रह गरेको छ ।
बैंकमा जाँदा कोरोनाका जोखिम हुने भएकाले राष्ट्र्र बैंकले विद्युतीय कारोबार र मोबाइल बैंकिङको कारोबार सीमा बढाएको छ ।
यस्तै इन्टरनेट बैंकिङमार्फत अकाउन्टमा पैसा ट्रान्सफर गर्दा एक दिनमा १० लाख र एक महिनामा ५० लाख रुपैयाँसम्म भुक्तानी गर्न पाइने भएको छ ।
एउटा वालेटबाट अर्को वालेटमा पनि एक पटकमा २५ हजार, एक दिनमा १ लाख र एक महिनामा ५ लाख रुपैयाँ पठाउन सकिनेछ ।
नोटमार्फत कारोबार गर्दा सङ्क्रमणको जोखिम बढेपछि नेपाल राष्ट्र बैंकले विद्युतीय भुक्तानीको सीमा बढाएको छ । राष्ट्र बैंकको निर्देशन अनुसार मोबाइल बैंकिङ वा कोडमार्फत भुक्तानी गर्दा एक दिनको सीमा एक लाख र महिनाको सीमा १० लाख रुपैयाँ पुर्याइएको छ ।
यस्तै बैंक खाताबाट वालेटमा पैसा पठाउँदा एक पटकमा २५ हजार, एक दिनमा १ लाख र एक ५ महिनामा लाख रुपैयाँसम्म पठाउन सकिनेछ ।
