रेडियो पर्वतमा आगलागी, प्रसारण सेवा ठप्प
पर्वत : सामुदायिक रेडियो ‘रेडियो पर्वत’मा गएराति आगालागी भएको छ। विद्युत् सट भएर राति १ बजे आगलागी हुँदा सम्पूर्ण सामग्री जलेर नष्ट भएका छन् भने घरमा समेत क्षति पुगेको छ।
आगलागीबाट रेडियोको ट्रान्समिटरमा समेत क्षति पुगेको छ भने ७ कम्प्युटर, २ मिक्स्चर, हाइब्रिड, टेलिभिजनलगायतका सामग्री पूर्णरूपमा नष्ट भएको रेडियोका स्टेशन म्यानेजर शङ्कर शर्माले जानकारी दिए। आगलागी भएसँगै बिहानदेखि रेडियोको प्रसारणसमेत बन्द भएको छ।
कुनै पनि सामान काम नलाग्ने भएकाले बन्द गर्नुको विकल्प नभएको शर्माले बताए। उन्का अनुसार आगलागी भएपछि स्थानीयवासी र प्रहरीको सक्रियतामा राति २ बजे आगो नियन्त्रणमा लिइएको थियो । विद्युत् जडान गरिएको स्वीचमा समस्या आएका कारण पूर्णरूपमा क्षति पुगेको हो। आगलागीबाट रेडियो सञ्चालित घरका ३ कोठामा समेत क्षति पुगेको छ ।
३० लाखभन्दा बढीको क्षति भए पनि यकिन विवरण भने आइनसकेको शर्माले जानकारी दिए । २०६४ देखि ग्रामीण क्षेत्र फलेवासबाट प्रसारण हुँदै आएको यो यस क्षेत्रको पहिलो सामुदायिक रेडियो हो।
