अमेरिकी राष्ट्रपतिलाई नोबेल शान्ति पुरस्कार मनोनयन गर्ने पाकिस्तानको घोषणा
इस्लामवाद। पाकिस्तानले अमेरिकी राष्ट्रपति डोनाल्ड ट्रम्पलाई नोबेल शान्ति पुरस्कारका लागि मनोनयन गर्ने घोषणा गरेको छ। गत महिना भारत र पाकिस्तानबिच युद्धविराम गराउन ट्रम्पले खेलेको भूमिकाको कदर गर्दै इस्लामवादले यस्तो घोषणा गरेको हो।
पाकिस्तानी सरकारले सामाजिक सञ्जाल एक्समा भनेको छ, ‘हालैको भारत–पाकिस्तान सङ्कटका बेला निर्णायक कूटनीतिक हस्तक्षेप र महत्त्वपूर्ण नेतृत्वका लागि’ ट्रम्प यो पुरस्कारको हकदार छन्।
यद्यपि, भारतले गत महिनाको लडाइँ अन्त्य गर्न अमेरिकाले मध्यस्थता गरेको कुरालाई अस्वीकार गर्दै आएको छ र कुनै पनि तेस्रो पक्षबाट कूटनीतिक हस्तक्षेप नचाहेको स्पष्ट पारेको छ।
ट्रम्पले आफैँ पनि पटक–पटक नोबेल शान्ति पुरस्कार पाउनुपर्ने बताउँदै आएका छन्। यस वर्षको विजेताको नाम अक्टोबरमा घोषणा गरिनेछ।
गत मे महिनामा आणविक शक्ति सम्पन्न दुई छिमेकीबिच चार दिनको लडाइँपछि ट्रम्पले भारत र पाकिस्तानबिच युद्ध विरामको आश्चर्यजनक घोषणा गरेका थिए।
पाकिस्तान सरकारले शनिबार बिहान आफ्नो पोस्टमा भनेको छ, ‘राष्ट्रपति ट्रम्पले इस्लामवाद र नयाँ दिल्ली दुवैसँग बलियो कूटनीतिक संलग्नतामार्फत उत्कृष्ट रणनीतिक दूरदर्शिता र तारिफयोग्य स्टेट्सम्यानशिप देखाउनुभयो, जसले तीव्र गतिमा बिग्रँदै गएको अवस्थालाई नियन्त्रणमा ल्यायो।’
पोस्टमा थप भनिएको छ, ‘यो हस्तक्षेप एक सच्चा शान्ति निर्माताको रूपमा उहाँको भूमिकाको प्रमाण हो।’ यस विषयमा वासिङ्टन वा नयाँ दिल्लीबाट तत्काल कुनै प्रतिक्रिया आएको छैन।
ट्रम्पले बारम्बार अमेरिकाको मध्यस्थतामा भारत र पाकिस्तानले द्वन्द्व अन्त्य गरेको र उनीहरूलाई सहमत गराउन आफूले व्यापारलाई हतियारको रूपमा प्रयोग गरेको बताउँदै आएका छन्। पाकिस्तानले युद्धविराममा अमेरिकी मध्यस्थताको कुरालाई समर्थन गरेको छ, तर भारतले यसलाई अस्वीकार गरेको छ।
मिश्रित प्रतिक्रिया
पाकिस्तानको सिनेट रक्षा समितिका पूर्व अध्यक्ष मुशाहिद हुसैनले यस कदमको प्रशंसा गरेका छन्। उनले रोयटर्सलाई भने, ‘ट्रम्प पाकिस्तानका लागि राम्रा छन्। यदि यसले ट्रम्पको अहंकारलाई सन्तुष्ट पार्छ भने, ठिकै छ। सबै युरोपेली नेताहरूले उनलाई निकै चाप्लुसी गरिरहेका छन्।’
तर, अमेरिकाका लागि पाकिस्तानकी पूर्व राजदूत मलिहा लोधीले यस कदमलाई ‘दुर्भाग्यपूर्ण’ भन्दै आलोचना गरेकी छन्। उनले एक्समा लेखिन्, ‘गाजामा इजरायलको नरसंहारयुक्त युद्धलाई समर्थन गर्ने र इरानमाथिको इजरायली आक्रमणलाई ‘उत्कृष्ट’ भन्ने मान्छे।’ उनले थपिन्, ‘यसले हाम्रो राष्ट्रिय स्वाभिमानमा सम्झौता गर्छ।’
ट्रम्पले रुस–युक्रेन र इजरायल–गाजा युद्ध तुरुन्तै अन्त्य गर्ने वाचाका साथ पदभार ग्रहण गरेका थिए, यद्यपि दुवै द्वन्द्वमा शान्ति सम्झौता गराउन उनी हालसम्म असफल रहेका छन्। उनले सन् २००९ मा अमेरिकी राष्ट्रपति बनेको आठ महिना नपुग्दै नोबेल शान्ति पुरस्कार जितेकोमा बराक ओबामाको बारम्बार आलोचना गर्ने गरेका छन्।
