प्रधानमन्त्री देउवाले बोलाए मन्त्रिपरिषद् बैठक, सचिव बढुवा निर्णय गर्दै
प्रधानमन्त्री शेरबहादुर देउवाले आज (शुक्रबार)मन्त्रिपरिषद्को बैठक बोलाएका छन् ।
प्रधानमन्त्रीको दोस्रो पटकको कोभिड परीक्षण रिपोर्ट नेगेटिभ आएसँगै बैठक दिउँसो ३ बजे सिंहदरवारस्थित प्रधानमन्त्री तथा मन्त्रिपरिषद् कार्यालयमा बोलाइएको हो ।
प्रधानमन्त्रीले देउवाले बैठकसँगै अन्य नियमित कार्यक्रममा पनि सहभागिता जनाउने कार्यक्रम रहेको छ ।बिहीबार गरिएको कोभिड परीक्षणमा रिपोर्ट नेगेटिभ आएको प्रधानमन्त्री देउवाको यस अघि गत सोमबार गरिएको परीक्षणमा पनि नेगेटिभ आएको थियो ।
गत शनिवारदेखि राजनीतिक भेटघाट र औपचारिक कार्यक्रम स्थगित गर्दै आइसोलेसनमा बसेका देउवा आजबाट सबै कार्यक्रममा सहभागी हुने कार्यक्रम तय भएको सचिवालय स्रोतले जानकारी दिएको छ ।
आजको मन्त्रिपरिषद् बैठकले बढुवा सिफारिस समितिको बैठकले सिफारिस गरेका एक सचिवलाई बढुवा गर्दै छ । मङ्गलवार लोक सेवा आयोगका अध्यक्ष माधव प्रसाद रेग्मीको अध्यक्षतामा मङ्गलवार बसेको बढुवा सिफारिस समितिको बैठकले सहसचिवत्रय रामेश्वर दंगाल, मुकुन्द प्रसाद निरौला र शंकरप्रसाद खरेलको नाम सिफारिस गरेको थियो ।
