प्रतिनिधि हेरफेर गरेको भन्दै राप्रपाको एक दर्जन जिल्लामा महाधिवेशनमा विवाद
राप्रपाको एक दर्जन जिल्लामा महाधिवेशन प्रतिनिधिमा विवाद देखिएको छ । बुधबारदेखि सुरु भएको राप्रपाको महाधिवेशन शनिबार नयाँ नेतृत्व चयन हुने कार्यक्रम रहेको तर, चुनावको एक दिनअघिसम्म केही जिल्लामा प्रतिनिधिको विवाद देखिएको हो ।
केन्द्रीय सचिवालयमा आएको प्रतिनिधिको कतिपय सूचीलाई संस्थापनले आफू अनुकूल परिवर्तन गरेको भन्दै बुधबार राति राजेन्द्र लिङ्देन समूहले पार्टी कार्यालय घेराउ गर्दै नाराबाजी समेत गरेको थियो ।
राप्रपा नेता सुन्दर पाण्डेले काठमाडौँ, ललितपुरसहित एक दर्जन जिल्लामा प्रतिनिधिको विवाद रहेको र सो को समाधान गरेर निर्वाचनमा जानुपर्ने बताए । त्यसका लागि उच्चस्तरीय विवाद समाधान समिति गठन गर्ने विषयमा छलफल भइरहेको उनको भनाइ छ ।
लिङ्देन समूहले महाधिवेशन प्रतिनिधिको विवाद टुङ्गो लगाएर चुनावमा जानुपर्ने बताउँदै आएको छ भने यही विषयमा नेताहरू आन्तरिक छलफलमा रहेको पाण्डेको भनाइ छ ।
राप्रपाका जिल्ला कार्यसमितिले सिफारिस गरेर केन्द्रमा पठाएको कतिपय महाधिवेशन प्रतिनिधिको सूची केन्द्रमा परिवर्तन गरिँदा समस्या भएको नेताहरूले बताएका छन् ।
नेताहरू आन्तरिक छलफलमा जुट्न राप्रपाको दोस्रो दिनको बन्दसत्र समेत प्रभावित भएको छ । बिहान ८ बजेदेखि सुरु हुने भनिएको बन्दसत्र अहिलेसम्म सुरु हुन सकेका छैन ।
बन्दसत्रमा अध्यक्षत्रयले पेस गरेको राजनीतिक र विधान संशोधन प्रस्तावमाथि छलफल भएर पारित गर्ने कार्यसूची रहेको छ ।राप्रपाको नयाँ नेतृत्वका लागि वर्तमान अध्यक्ष कमल थापा र नेता राजेन्द्र लिङ्देन दौडमा छन् । उनीहरूले प्यानलसहित चुनावी प्रतिस्पर्धा गर्ने भनिए पनि हालसम्म घोषणा भने भइसकेको छैन ।
