रोकिएको महाधिवेशनलाई अघाडि बढाउन कांग्रेस निर्वाचन समितिले आज पदाधिकारीसँग छलफल
रोकिएको महाधिवेशनलाई अघाडि बढाउन नेपाली कांग्रेसको निर्वाचन समितिले आज कांग्रेसका पदाधिकारीहरुसँग छलफल गर्ने भएको छ ।
केन्द्रीय निर्वाचन समितिले कांग्रेसको रोकिएको महाधिवेशन प्रक्रिया अघि बढाउनेबारे आज पदाधिकारीहरुसँग छलपल गर्न लागेको हो ।
महाधिवेशन कार्यतालिका अनुसार गएको भदौ १८ गते वडा अधिवेशन थालेको कांग्रेसको यसपछिका कार्यतालिका भने प्रभावित भएका छन्।रसुवा र रौतहटको क्रियाशील सदस्यता विवाद अहिलेसम्म मिलेको छैन ।
बाँकी ११ जिल्लामा अधिवेशन प्रक्रिया सुरु गर्नेबारे हिजो केन्द्रीय निर्वाचन समितिको बैठकले नयाँ कार्यतालिकाको खाका तयार गरेको छ ।तल्लो तहको अधिवेशन प्रक्रिया सुरु भएको ६४ जिल्लामध्ये अहिलेसम्म ४६ जिल्लामा पालिकासम्मको अधिवेशन सकिएको छ भने १३ वटा जिल्ला अधिवेशन भएको छ ।
दशैँ अघि नै २१ वटा हिमाली जिल्लाको अधिवेशन सम्पन्न गर्ने भनिए पनि रसुवामा अधिवेशन प्रक्रिया नै सुरु भएको छैन । त्यस्तै, प्रदेश–२ को ८ जिल्लासहित डोल्पा, कैलाली, बाँके, सुर्खेतमा पनि अधिवेशन प्रक्रिया सुरु भएको छैन ।
निर्वाचन समितिका संयोजक महादेवप्रसाद यादवका अनुसार त्यही खाकाबारे आज पदाधिकारीसँग छलफल गर्न लागिएको हो । पूर्व निर्धारित कार्यतालिका अनुसार कांग्रेसको असोज १८ गतेसम्म सबै जिल्ला अधिवेशन सम्पन्न गर्नुपर्ने थियो भने भोलिदेखि १२ गतेसम्म प्रदेश अधिवेशन हुनु पर्ने थियो ।
तर, सभापति शेरबहादुर देउवाले नै समयमा महाधिवेशन गर्न चासो नदेखाएकाले ढिलाइ भइरहेको कांग्रेस नेताहरुको गुनासो छ । कांग्रेसको मंसिरमा महाधिवेशन गर्ने भनिए पनि अनिश्चित बन्दै गएको छ ।
