यातायात व्यवस्था विभागले लाइसेन्सको परीक्षा सञ्चालन गर्ने
लकडाउनका कारण लामो समयदेखि राकिएको लाइसेन्सको परीक्षा यातायात व्यवस्था विभागले सञ्चालन गर्ने भएको छ ।
महामारीको जोखिम कायमै रहेकाले निश्चित मापदण्ड पालना गरी परीक्षा सञ्चालन गरिने विभागले जनाएको छ । तोकिएका मापदण्ड पूरा गरेर अबको एक सातापछि सवारी चालक अनुमतिपत्र परीक्षा सञ्चालन हुने विभागले जनाएको छ ।
विभागले लाइसेन्स परीक्षा सञ्चालन तथा व्यवस्थापनसम्बन्धी मापदण्ड २०७८ तय गरिसकेको छ ।परीक्षार्थीहरूलाई ट्रायल हुने समय तोकी २४ घण्टाअगाडि जानकारी गराइने विभागले जनाएको छ ।
तोकिएको समयमा उपस्थित नभए सो दिनका अन्य सिफ्टमा समेत सामेल हुन नपाउने विभागको भनाइ छ । परीक्षा सञ्चान गर्दा एक सिफ्टमा बढीमा ५० जना परीक्षार्थी मात्रै सामेल गराइने मापदण्डमा उल्लेख छ ।
मापदण्डअनुसार परीक्षार्थीहरुले केन्द्रमा प्रवेश गर्नुअघि मास्क, स्यानिटाइजर र पिउने पानीको व्यवस्था आफैं गर्नुपर्नेछ । परीक्षा सुरु हुनु १५ मिनेट अगाडि मात्रै केन्द्रमा उपस्थित हुनुपर्ने छ ।
