९९ केन्द्रीय सदस्य थप्दै माओवादी केन्द्र, ४० वर्ष मुनिकालाई प्राथमिकता
नेकपा माओवादी केन्द्रले ९९ जना नयाँ केन्द्रीय सदस्य थप गर्ने भएको छ । पार्टीको प्रस्तावित नयाँ विधानमा २९९ सदस्यीय केन्द्रीय समिति बनाउने उल्लेख छ ।
उक्त विधान केन्द्रीय समितिको बैठकबाट पारित भएपछि लागू हुने छ ।स्रोतका अनुसार दुई सय सदस्यीय केन्द्रीय समितिमा ९९ सदस्य थपेर २९९ सदस्यीय केन्द्रीय समिति बनाइने तयारी भइरहेको छ ।
नयाँ थपिने सदस्यहरूमा ४० वर्षमुनिका युवाहरूलाई प्राथमिकता दिइने बताइएको छ । नयाँ थपिने केन्द्रीय सदस्यमा महिलालाई ३५ प्रतिशत र दलितलाई १५ प्रतिशत कोटा छुट्याइएको बताइएको छ ।
केन्द्रीय समितिमा क कसलाई थप्ने भनी पार्टीको तल्लो तहबाटै सुझाव सङ्कलन भइरहेको छ । केन्द्रीय समिति टुङ्गो लागेपछि पोलिटव्यूरो र स्थायी कमिटी टुङ्गो लाग्ने छ ।
सर्वोच्चले नेकपाको पार्टी एकता भङ्ग गरिदिएपछि माओवादी केन्द्र हाल नयाँ सङ्गठन निर्माणको तयारीमा जुटेको छ । पूर्वमाओवादी नेताहरू रामबहादुर थापा ‘बादल’, टोपबहादुर रायमाझी, लेखराज भट्ट, मणि थापा, प्रभु साह, गौरीशङ्कर चौधरी लगायतका नेताहरू एमाले प्रवेश गरेका छन् । उनीहरूको स्थान पनि रिक्त भएको छ ।
सर्वोच्चले २०७७ फागुन २३ मा एकता बदर गरिदिएको थियो । गत चैतमा बसेको माओवादीको केन्द्रीय समिति बैठकमा १ सय ८५ जना उपस्थित थिए । सो बैठकमा १० जना अनुपस्थित भएको र एमालेसँग एकता भएयता ५ जना केन्द्रीय सदस्यहरूको मृत्यु भएको बताइएको छ ।