निर्वाचनको निर्णयविरुद्ध सर्वोच्चमा जाने जसपाको उपेन्द्र यादव पक्षको तयारी
निर्वाचन आयोगले गरेको निर्णयप्रति असन्तुष्ट देखिएको जसपा नेपालको उपेन्द्र यादव पक्षले न्यायिक निकास नभए अदालत जाने तयारी गरेको छ ।
यादव पक्षका शीर्ष नेताहरुबीच पार्टीको केन्द्रीय कार्यकारिणी समितिको बहुमतले गरेको निर्णय कार्यान्वयन हुन नसक्ने आयोगको निर्णयविरुद्ध सर्वोच्च अदालत जानेबारे छलफल भइरहेको छ ।
निर्वाचन आयोगले जसपामा २ जना अध्यक्ष रहने व्यवस्था रहेको भन्दै एकजना अध्यक्षको मात्रै हस्ताक्षरमा भएको पदाधिकारी हेरफेर वा निष्कासन सम्बन्धी निर्णय स्वीकृत नहुने ठहर गरेको थियो ।
जसपाले भने पार्टीको बहुमत पक्षले गर्ने निर्णय कार्यान्वयनमा बाधा हुन नहुने भन्दै निर्वाचन आयोगसँग छलफल गर्ने तयारी थालेको छ ।
‘निर्वाचन आयोगसँग छलफल गरेर थप प्रष्ट पार्ने प्रयास पहिलो चरणमा हुनेछ । त्यसबाट पनि निकास भएन भने न्यायिक निकासको खोजी त गर्नैपर्छ’, जसपा नेता गंगानारायण श्रेष्ठले भने । निर्वाचन आयोगले पदाधिकारी हेरफेर भन्दा कुन जसपा वैध हो ? भन्नेबारे निर्णय दिनुपर्ने श्रेष्ठको भनाइ छ ।
पार्टीभित्र विभिन्न विकल्पमा छलफल भइरहेको भन्दै नेता श्रेष्ठले आयोगसँग छलफल र अदालत जाने दुवै विषयबारे छिट्टै निर्णय हुने बताए ।
