मदरसामा दुई बालकको हत्या, बाराको सरंगापुरमा भेटियो शव
प्रदेश २ स्थित बारा जिल्लामा दुई जना बालकको घाँटी रेटेर हत्या भएको छ । जिल्लाको कलैया उपमहानगरपालिका ७ स्थित सरंगापुर बस्ने ९ वर्षीय उशमान अन्सारी र ७ वर्षीय अमिन अन्सारीको हत्या भएको हो ।
स्थानीय मदरसामा हत्या गरिएको अवस्थामा दुबैजनाको शव फेला परेको बाराका प्रहरी प्रवक्ता डीएसपी गौतम मिश्रले जानकारी दिए ।
मिश्रका अनुसार हिजो बेलुकी ७ बजे उनीहरू घरबाट खेल्न भन्दै निस्केका थिए ।
रातिसम्म घर नआएपछि उनीहरूको खोजीगर्दा समेत नभेटिएपछि बेपत्ता भएकोबारे प्रहरीलाई खबर गरिएको थियो ।
डीएसपी मिश्रसाहित प्रहरी टोलि घटना स्थलमा पुगेको छ । घटनामा संलग्न केही शंकास्पद व्यक्तिहरूलाई नियन्त्रणमा लिई अनुसन्धान समेत भइरहेको उनले जनाए ।